Premier League aṭangin Tuten nge Champions League leh Europa League khel dawn?
Premier League season a tawp hnai a, champion tur a la chian loh ang bawkin season thara Europe inelnaa tel tur a la chiang lo. Zanin dar 10:30 hian Manchester United-in Leicester City an mikhual dawn a, inkhel result hian nghawng a nei lian dawn.
Ole Gunnar Solskjaer-a hoten May 13, Ningani zanah Liverpool an mikhual leh dawn a, Premier League aṭanga Europe khel turin Man United kutah thui tak a awm.
Quota engzat nge?
Premier League aṭangin team paliin Champions League an khel dawn. Hemi bakah hian UCL leh Europa League champion-in an khel thei bawk a, chutihrualin ram pakhat aṭangin team panga chauhin an khel thei thung.
Manchester khaw club pahnihin Champions League an khelh chian tawh avangin English club panganin UCL an khelh dawn chuan Europe-ah Chelsea an champion a ngaih bakah Thomas Tuchel-a hote hi Premier League-ah palina aia hniamah an awm a ngai.
Season thar aṭangin Europa Conference League a awm ṭan dawn a, hemi a nih avang hian Europa League-ah team hnih tan chiah hmun ruak a awm. Tun dinhmunah FA Cup final khel tur Chelsea leh Leicester City te a sang paliah an awm ve ve avangin table-a paruknain Europa League an khel dawn.
Inelna thar Europa Conference League hi League Cup champion khelh tur a ni a, Manchester City-in UCL an khelh dawn avangin league-a pasarihnain inelna thar hi an khel thei ang.
United kutah a awm?
Manchester United-in Champions League khelh tum Leicester City leh Liverpool an hmachhawn dawn avangin an kutah thui tak a awm. Ole Gunnar Solskjaer-a hote hian ni riat chhungin match li an khel dawn a, hemi a nih avang hian Norwegian manager thutlukna siam dan tur hi club ṭhenkhat tan hriatthiam a har thei ang.
Solsjkaer chuan, "Champions League khel tur a nghawng dawn avangin ka team thlan danah tute emaw chu an lungawi lo ang. Mahse ka buaina tur a ni lo a, kan vai buaina vek a ni. Engtin nge hun chep tak chhungin ka player ṭha chhawr vek thei ang," tiin a sawifiah lawk.
United boss hian AS Roma leh Aston Villa an hmachawn ṭumin player ṭha a luhtir tawh a, Foxes nen hian team nem zawk a luhtir ngei a rinawm. Solsjkaer-a hote hian FA Cup quarterfinal-ah Leicester City hi 3-1 in an hneh lo tawh a, team nem zawk nen chuan chak lo thei dinhmunah an ding.
Brendan Rodgers-a hote hian Man United hi an hneh a nih chuan point 66 an hmu dawn. Foxes hian point hmu tawh lo pawh ni se West Ham tan umpha tur chuan match hmabak pathumah chak vek a ngai a, Liverpool tan match hmabak pali aṭangin point 10 hmuh a ṭul bawk.
Inkhel hmabak
Leicester City-in Manchester United an hmachhawn zawhah FA Cup final-ah Chelsea nen an inkhel dawn a, chumi zawh chuan Chelsea nen bawka inkhelin league match hnuhnung berah Tottenham Hotspur an hmachhawn ang. Brendan Rodgers-a hote hian palinaa awm chiang turin point sarih an hmuh a ngai a, an khingpui tur enin a awlsam dawn lo.
Chelsea hian Premier League aṭanga UCL khel turin point ruk an mamawh a, an hmabakah Arsenal, Leicester City leh Aston Villa te an la tum dawn. Hammers-in Brighton, West Brom leh Southampton an hmachhawn dawn a, an elpui team an tum dawn loh avangin beiseina tlem a la awm.
Liverpool-in match li khelh tur an la nei a, Manchester United, West Brom, Burnley leh Crystal Palace te an la hmachhawn dawn. Tottenham tan Champions League beiseina tlem tawh mah se Europa League khel turin beiseina an la nei sang. Spurs hian Wolves, Aston Villa leh Leicester City te nen an la inkhel ang.
