Real Madrid aiin Betis an 'Real' zawk!

Spanish La Liga-ah beisei loh result a thleng leh ta. Pathianni zan khan Real Madrid chuan khualmualah 2-1 in Real Betis an ngam lo a, Barcelona tan champion kalkawng an hawng leh ta. 

Real hian El Clasico-a Barcelona an hneh avangin league table chung ber an luah a, Real laka an tlawm hnua an match hmasa berah Barca hian Inrinni zan khan Real Sociedad chu 1-0 in an hneh. Barca hi table chung berah an awm zui a, an dinhmun innghahna erawh Real an ni - Zinedine Zidane-a naute hian Pathianni zanah hnehna chang se chuan table chung ber luah zui leh tur an ni. Mahse, chak tura ngaih an nihna mualah Real Madrid an chak zo lo a, pahnihnaah an awm leh ta - an season chhe ber pawlah pawh champion thei dinhmunah Barcelona an ding mek!

Betis muala inkhelah rin loh takin mualneitu team lamin inkhel an thunun zawk a, first half tawp nan minute nga chauh a awm tawh tihah goal hmahruai an rawn khung. 

Mualneitu team tana goal hmasa ber hi Sidnei-a khung a ni a, Brazilian defender goal khung hi goal ṭha bik a nih avangin Real goalkeeper Thibaut Courtois chu dem theih a ni lo. Goal dang lut loin first half a tawp mai dawn niin a lang hman a, mahse chawlhlawk hma hun pek belh minute thumnaah goal khungtu Sidnei a chesual - Marcelo a ti tlu a, penalty a chawi. Real tan striker Karim Benzema chuan penalty hi goal-ah a chantir a, phurrit lutuk phur loin mikhual team hian dressing room an pan theih phah.

Second half-ah team pahnihin goal khung an harsat ve ve a, Real hi point khat nen an haw dawn niin a lang - mah se Cristian Tello-a'n ngaihdan dang a lo nei a, Real hi sawi tur nei chunga hawtir a tum lo. Kum 28 mi forward hian minute 82-naah an goal hnihna a rawn khung a, Betis leh Barcelona lawmna a thlen. Hun tawp thlengin goal dang a lut lo a, 2-1 in Betis an chak. 

Barcelona youth system chhuak Tello hian 2010-14 season kha Barcelona tan a khel a, Catalan club tan hian inelna hrang hrangah match 86 khelhsakin goal 20 a khung. Barca hian tun season-ah La Liga nomawi an chawi a nih phawt chuan Tello an theihnghilh lo ang. Real hian an goal hnihna an chhuah hnuah si phurh sutna remchang an nei a, mahse Ferland Mendy-a shot chu Betis goalkeeper Joel Robles chuan ṭha zetin a dansak a, Benzema-a'n a goal hnihna khungna remchang a neih chu a hlah bawk. 

Season hmang chhe tak Real Betis hi tun season-ah team hlauhawm tia sawi an ni ngai lo a, mahse Madrid tan erawh hmachhawn an hautak tih a lang - goal hnih piah lamah chance hlauhawm an nei nual.  

Barca defender hlui Marc Bartra chuan yard ruk vel leka hla aṭangin tauh goal theihna remchang a nei a, mah se a hmaah goal ruak a awm chungin a tauh lut thei lo. Winger tawnhriat ngah Joaquin-a'n goalkeeper Thibaut Courtois-a tlan hel vek hnuah khungna remchang nei mah se Luka Modric chuan goal line aṭangin a lo pet chhuak hman. Season hmasaa Liverpool nena sawizawm hlawh Nabil Fekir chuan ropui taka goal khung theihna hun a nei a, mahse a shot ṭha tak chu Courtois thiamna faknaah a chang. 

Real-in Cristiano Ronaldo an nei tawh lo a, a hmun ruak luah tura an beisei Eden Hazard chuan hliam vangin a man phu tawk angin Spanish khawpuiah a la khel lo bawk. 

Karim Benzema chungah mawhphurhna rit tak a tla a, mahse a phur zo rih lo ni berin a lang. Tun season match 39-a goal 19 a khung hi mawi tawk tak ni mah se a match hnuhnung 14-a goal hnih chiah a khung hi Zidane lu tihaitu a tling ang. Betis goal hnihna kha Benzema tihsual aṭanga lut a ni a, he striker hian goal khung a harsat a ni satliah lo a, a chetsualnain an khingpui tan goal khungna remchang a siamsak. Real-in thawh an duh chuan Benzema a thawh hmasak a ṭul a, kum 2020-a a 'form' duhawm lo tak hi a thai chhe thei lo a nih chuan Real tan kawl a êng bik lo ang.