Chelsea mualah Arsenal an lut dawn
Zanin dar 12:45 hian Stamford Bridge-ah Chelsea chuan Arsenal an lo mikhual dawn a, team pahnih hi dinhmun inang lo tak ni mah se 'London Derby' a ni miau a, inkhel a hmuhnawm ang.
Champions League final khel tur Blues tan intuaihriamna hun a ni dawn, an khingpui tur Gunners erawh Premier League bakah inelna danga beisei nei tawh lo an ni - an tih theih chu mahni zahawmna hum tura club lian hneh tum a ni dawn.
Tuchel-a Chelsea
A la rei lo, kumin January 26 mai khan a ni Chelsea manager tura Tuchel an lakluh ni kha. Khatih hunlai khan Blues hi Premier League-ah pakuana an ni - tuna Arsenal dinhmun nen hian a inang chiah tihna a ni.
Thla thum leh a chanve vel chauh a la liam, tunah chuan UCL final leh FA Cup final khelh hmabak an ni a, league lamah pawh Gunners hi an hneh a nih chuan a sang pali zinga tel turin an dinhmun a ṭha tawh viau bawk ang.
Zaninah Blues hi chak se, Ningani zanah Liverpool-in Manchester United an hneh loh bawk chuan season thara UCL khel turin Tuchel-a naute an tling chiang tawh dawn. Kumin tir lama an dinhmun leh tuna an thlen chin hi chu a inthlau vet vet hle.
Club lian ngamtu
Frank Lampard enkawlna hnuaiah Chelsea khan club lian an hneh hleithei lo. Premier League-ah team ṭha paruk 'Big Six' tia sawite an hneh ngai lo, vawi thum an tlawm bakah ṭum hnih chu an inhnehtawk pui; an draw pakhat zawk hi Arsenal an ni.
Tuchel a rawn lan chinah erawh thawnthu a danglam. German manager hian hun rei lote chhungin manager ṭha - Pep Guardiola, Jurgen Klopp leh Jose Mourinho te chu league-ah a hneh a, inelna dangah Zinedine Zidane, Diego Simeone (vawi 2) leh Carlo Ancelotti te pawh a hneh.
FA Cup aṭangin Guardiola enkawl Manchester City an pet chhuak thei bawk. City nen hian UCL final khel tur an la ni bawk a, inrintawkna an nei sang tawh hle ang. Tuchel-a'n a hneh takte khi Arsenal aia team khauh zawk an ni, chuvangin Arteta naute an hlau lo ang.
Rawlthar rual
Pierre-Emerick Aubameyang an chelh a, man tam takin Nicolas Pepe an lalut - Chelsea aṭangin tawnhriat ngah Willian an la bawk. Season tira Arsenal beiseina kha sang tak a ni, mahse tuna an thlen chin chu inhrilh nawn a ngai lo.
West Brom lakah Arteta-a'n rawlthar rual hmangin hnehna a chang a, an innghahna an nih thu a sawi zui bawk. Blues nen an intawn hmasak ṭuma che ṭha tak Emile Smith Rowe chu tun hnaiah a khel ṭha hle.
English midfielder Smith Rowe hian N’Golo Kante leh Jorginho te hmaah eng ang taka ṭha nge a nih a fiah dawn. Smith Rowe, Bukayo Saka leh Gabriel Martinelli te hi an innghahna tur an nih avangin zaninah hian season thara an hlimthla tur ṭhenkhat a lang ang.
Arteta inring rawh
Nikum Krismas ruai ṭheh ni khan Emirates Stadium-ah team pahnih hi an intawng a, mualneitu lamin 3-1 in hnehna an chang - khatih laia Blues enkawltu chu Lampard a ni a, tunah chuan Tuchel kaihhruai an nih tawh avangin boruak a danglam dawn.
FA Cup a lak avanga fak hlawh Arteta hi tunah chuan dem rawn a ni mek a, season puitlinga team a enkawlna hmasa berah beisei a phak lo hle. Chelsea bakah hian Crystal Palace leh Brighton te an la hmachhawn leh dawn, a hmawr bawk fuh hram an tum ang.
Tunlaia team pahnih dinhmun thlir chuan Arsenal hi chak lo tura ngaih an ni. Amaherawhchu, tun kar tawpah Blues hian FA Cup final khelh hmabak an nei nghal a, tun ṭumah hian player an 'khek' a rinawm - an indahṭha a nih chuan Gunners tan chak beiseina a awm.
