Nadal hmaa ding tur Sinner

Italian Open khelh laiah Thawhṭan zan khan Jannik Sinner chuan Ugo Humbert hnehin second round a lut a, a match lehpekah chuan world number 2 Rafael Nadal nen an inhmachhawn leh ang.

Kum 19 mi Sinner hian Humbert lakah 6-2, 6-4 in hnehna a chang a, nikum lam ang bawkin clay court-ah result a nei ṭha dawn niin a lang. Zanina a hmachhawn tur Nadal paltlang tur erawh chuan vanneihna a mamawh tel dawn.

Thla sarih liamta mai khan Sinner leh Nadal te hi French Open quarterfinal-ah an intawng a, player dang tam takin an tih theih ngai lo Nadal laka set lak chu Italian rawlthar hian a ti thei.

An intawn hmasakin Nadal hi hneh lo mah se Sinner khelh danin sawi zui a hlawh a, tun ṭumah pawh hian Spanish star barakhaih thei turin theihna a nei sang ve tawk - inkhel a hmuhnawm ang.

Sinners chuan, "Roland Garros kan khelh ṭuma ka rilru ang kha tun ṭumah hian ka neih leh theih ngei ka beisei, ka mamawh chu hlauthawng miah loa khelh theih a ni ang," tiin a sawi. Tun season clay court bikah Nadal hi vawi kua chakin ṭum hnih a tlawm, hneh theih chu a ni.

Inkhel dangah
Taylor Fritz chuan Daniel Evans lakah 6-3, 6-2 in hnehna a chang a, tualchhung tlangval hian second round-ah chuan world number 1 Novak Djokovic a hmachhawn ve leh thung ang.

Fritz leh Djokovic te hi January thla khan Australian Open-ah an lo inhmachhawn tawh, inhnehtawk taka set nga an khelh hnuah Serbian star a chak - tun ṭumah pawh hian inkhel hmuhnawm an chhawp chhuah a rinawm.

Mipa singles inkhel dangah hian Japanese tlangval Kei Nishikori leh Stefano Travaglia te pawhin an khingpui ve ve hnehin second round an inhlangkai ve bawk.