Champions League final khelhna tur a la chiang lo

UEFA-in Champions League final khelhna turin Istanbul tichiang tawh mah se British sorkarin Covid-19 hri vei tamna Turkey-ah inkhel entu kal an phal loh avangin nomawi inchuhna tur hmun hi an thlak leh a rinawm zawk.

Thawhṭanni khan UEFA, UK sorkar aiawh leh Football Association aiawhte Champions League final khelhna hmun tur chungchangah an inhmukhawm a, thu chiang a la awm thei lo.

Kumin UCL final-ah hian English club pahnih Manchester City leh Chelsea te an inkhel dawn a, nomawi inchuhna hi May 29-ah neih tur a ni.

British prime minister Boris Johnson chuan, "Final hi kan thleng a nih chuan a lawmawm khawp ang. English club pahnih final-a fan-ten inkhel an en thei lo tur hi chu pawm thiam a har," tiin a sawi.

Champions League final khelh hun leh Premier League khel tur zawnna playoff final khelh hun a inrual a, EFL lamin a hun sawn duh lo mah se thuneitu sang aṭanga nawrtu an awm chuan an inhnuhhniam tho a ṭul ang.

UEFA hian Ataturk Stadium-ah entu 25,000 awmtir an tum a, amaherawhchu England-ah entu 10,000 chauh an la phal. British sorkarin an dan hi an thlak lo a nih chuan English mipui zin theihna hmun Portugal-ah final hi khelh a ni thei bawk.

Season liam ta final kha Ataturk Stadium, Istanbul-ah khelh tura ruahman a ni a, amaherawhchu Covid-19 vangin Portugal-in quarterfinal a thleng ta zawk. Final-ah Bayern Munich-in PSG 1-0 in an hneh a, inkhelhna hmun hi Estádio da Luz, Lisbon niin entu an awm lo.