Japan mipui zingah Olympic ṭhulh duh an tam

Tokyo Olympic 2020 neih nan thla thum pawh a awm tling tawh a, infiamna khawmpui lian thleng tur Japan rama zirchianna an neihin a tarlan dan chuan, ram mipui tam zawk chuan coronavirus vangin Olympic thlen loh mai an duh.

Japan rama chanchinbu lian 'Yomiuri Shimbun' chuan May 7-8 chhung khan zirchianna an nei a, hetah hian 'Olympic thlen loh' tih leh 'Olympic thlen' tih chu duhthlan tur an siam a ni a, zawhna chhangtu 59% zetin inelna thlen loh mai an duh.

Chhangtu zinga 39% chuan hrileng vanga harsatna karah pawh Olympic thlen hram an duh thung. Zawhna chhan turah hian 'Olympic hun sawn' tih chu duhthlan tur zingah telh a ni lo, International Olympic Committee (IOC) chuan a hun hi sawn a nih theih tawh loh thu an ti chiang tawh.

Tun hnai khan TBS News pawhin zirchianna an lo nei tawh a, zawhna chhangtu 65% zetin Olympic thlen loh an duh. April thla khan Kyodo News Agency pawhin an lo zirchiang tawh a, hemi ṭum pawh hian 70% zetin thlen loh mai an duh.

Hrileng vanga buaina karah pawh Japanese prime minister Yoshihide Suga chuan Olympic hi thlen ngei an tum thu a la sawi fan a, mahse ram mipui tam zawkin an thlawp lo a nih chuan thil tih tlang hrehawm tak chu a ni ang tih a chiang.

Khawvel ram dangte nena khaikhin chuan Japan hi hrileng tuarna tak an ni hran lo, hri vangin mi 11,000 vel an thi tawh. Tunah hian inkharkhipna kalpui mek a ni a, inkharkhipna kalpui lai hian May thla tawp thleng a awh dawn.

Tun kar hian IOC president Thomas Bach pawh Japan rama zin tur ni mah se an ṭhulh. Tokyo Olympic organizing committee chuan, "Thomas Bach lo zin tur chu ṭhulh rih a ni. Mahse, kar leh lamah chuan Hiroshima a tlawh theih a rinawm," an ti.

Ruahman lawk dan chuan Tokyo Olympic 2020 hi nikuma neih tur kha a ni a, hripui leng vangin kum khatin an sawn tlai tawh. Inbuatsaih nan sum tam tak hman a ni tawh a, ṭhulh leh ngawt pawh thil harsa tak a ni dawn tih a chiang.

Mahse, Japan rama Olympic thlen loh mai duhtu an tam ta hle a, tun hnaiah pawh 'Olympic ṭhulh' a nih theih nana online petition an neihah chuan, ni thum chhung lekin mi 300,000 chuangin Olympic thlen loh mai an duh vangin hming an ziak hman a ni.

Japan ram aiawha tennis khel tur Naomi Osaka pawhin hrileng vangin infiamna khawmpui lian hi an neih theih loh mai a hlauh thu a lo sawi tawh. Grand Slam vawi 23 champion tawh Serena Williams pawh a dinhmun a chiang lo bawk.

Olympic thlengtu lamin an ruahman dan chuan infiammi zawng zawng nitin endik an ni dawn a, hrileng vang hian ṭum danga Olympic ropui taka an lo neih tawh ṭhin ang chu a phak a rinawm ta lo a ni.