Stadium khata entu awm beisei

Premier League chuan season tharah chuan kalphung pangngai zawm leh theih tawh an beisei a, stadium khatin a hmunah entu an awm leh theih ngei an beisei - English football ngainatute tan chanchin ṭha a ni ang.

Coronavirus vangin season hmasa chawhnu lam aṭang khan football khawvel a buai. A hmuna entu an awm thei lo a, hrilengin ziaawm lam a pan hnuah entu an awm thei leh ṭan a, stadium khat erawh an la ni lo.

April 25 a khelh League Cup final kha a hmunah entu 8,000 an awm a, tun kar tawpa FA Cup khelh tur hi mi 21,000 velin a hmunah an en theih beisei a ni bawk - season hmasa tawp lam nena khaikhin chuan lawmna tur lam zel a ni rih.

Premier League Chief Executive Richard Masters chuan, "Fans an lo kir leh thei ṭan hi a lawmawm hle, a nihna takah chuan fans tel lo chuan Premier League hi a nih tur ang a ni phak lo.

"Tun season league match khelh hmabak la awmah hi chuan mualneitu lamin fans tlem a zawng an nei thei ang, a bak chu tih zau a harsa. Sorkar lam nen kan indawr reng a, beisei dan chuan season tharah fans an lo kir ngei kan beisei," a ti.