Juve Sporting Director-in Andrea Pirlo ban a duh

Italian club lian Juventus chuan an coach Andrea Pirlo an ban loh tur thu tichiang mah se sporting director Fabio Paratici chuan Pirlo hi ban ngei a duh niin Italian media-ten an tarlang a, season tharah Pirlo hi kan hmu chhunzawm kher lo mai thei.

Juventus hian Pathianni zan khan Serie A match-ah AC Milan chu 3-0 in an ngam lo a, kum 2012 hnua a vawi khat nana league nomawi chawi lo tur club hi season thara Champions League khel lo thei dinhmunah an ding mek.

Hetiang boruak karah Juve hian league match thum leh Coppa Italia final chiah khelh tur nei tawh mah se Pirlo ban duhna thawm a ri a, Italian legend hian club-a kaihhruai chhunzawm chuan Champions League khelh loh mai hlauhthawnna a awm.

Mahse, club legend leh vice president Pavel Nedved chuan, "A tawp thlengin kan bei dawn a ni," a ti a, "Pirlo leh Cristiano Ronaldo-te Juve-ah an cham ang," a ti zui - season tharah pawh Pirlo leh Ronaldo chelh a tum niin a lang.

Hetihlai hian club sporting director Fabio Paratici chuan Pirlo ban a, assistant coach Igor Tudor chu season tawp thleng atana chhawr a duh nia sawi a ni - thlawptu a nei lo thung.

Italian media-te chuan Paratici hi Nedved nen club training ground Continassa-a parking-naah ring takin an inhau niin an sawi a, mahse, Nedved hi club football director Federico Cherubini leh president Andrea Agnelli-ten an thlawp miau avangin Pirlo a la bang rih dawn lo tih a chiang - season thar erawh engpawh thleng thei a ni.