Record thar siamtu Westbrook

Washington Wizards point guard Russell Westbrook chuan Oscar Robertson a khum a, basketball inelna sang NBA huanga triple-double nei hnem ber (vawi 182) a ni ta.

Kum 32 mi Westbrook hian Atlanta Hawks lakah 28 point, 13 rebound leh 21 assist a nei, mahse hun tawp dawnah remchang a hmuh chu a hloh avangin a team Wizards hi 125-124 in a chak lo zawkah an ṭang a, season tawpa playoff khel lo thei dinhmun an ding.

Basketball-ah chuan point, assist leh rebound te hi ngaihhlut a ni a, heng pathumte hi match khat chhunga 10 chuang vek an neih hman chuan triple-double an nei tihna a ni a, vawi 182 zet neih chu a ropui hle.

Westbrook chuan, "Hun tawn ropui leh hlimawm bik chu a ni a, ni dangah chuan mahni chanchin sawi hi nuam ka ti ngai lo, tun ṭum erawh chu lawmna tur a awm," a ti. Kum 82 mi Robertson pawhin a record khumtu Westbrook chu a lawmpui thu a sawi ve bawk.

Nimin zing inkhel dangah Golden State Warriors chuan Western Conference hmahruaitu Utah Jazz lakah 119-116 in hnehna an chang a, an thiampuipa Stephen Curry chuan point 36 nei lehin an chakna hnar a ni.

Memphis Grizzlies chuan New Orleans Pelicans lakah 115-110 in hnehna an chang a, NBA table-ah pakuana niin 'Western Conference play-in' khel turin an tling. Play-In Tournament hi conference pahnihna pasarihna leh pariatna ten playoff atana hmun ruak pakhat hnawh tur an zawnna a ni ang.

Western Conference-ah hian Golden State chuan vawi 36 hnehna chang tawhin pariatna dinhmun an luah a, an hnuaia awm Memphis Grizzlies leh San Antonio Spurs te nen playoff hmunruak an inchhuh chho zel dawn.

San Antonio Spurs pawhin Play-In an la beisei zel a, nimin zing khan Milwaukee Bucks chu 146-125 in an hneh. Team talbuai Houston Rockets chu Portland Trail Blazers lakah 140-129 in an tlawm a, Indiana Pacers chuan 111-102 in Cleveland Cavaliers an hneh ve bawk.