Prince William-a'n FA Cup final en dawn

May 15, zan dar 9:45-ah FA Cup final khelh a ni dawn a, Wembley Stadium-a Chelsea leh Leicester City inkhel tur hi Football Association (FA) president Prince William chuan a hmunah a en dawn.

Kum 2006 aṭanga FA President lo ni tawh Prince William hian champion hnenah nomawi a hlan dawn a, season hmasa khan Arsenal-in final-a 2-1 a Chelsea an hneh lai kha Covid-19 vangin a hmunah a lo en thei lo tawh a, sawm bikte nen Sandringham lama an inah an en thung.

UK sorkar chuan Covid-19 avanga inkhuahkhirhna dan an kalpui mek chu zawi muangin an thlah dul zel a, FA final pawh hi a hmunah mipui 20,000 zetin social distancing dan zawm chungin an en dawn a ni.

UK sorkar hian Covid-19 vanga inkhunghranna dan an hman thlah dul nan hian enchhinna vawi tam an lo kalpui tawh a, FA Cup semifinal-a Leicester City leh Southampton-te an inkhelh khan stadium hnaih tualchhung mi 4,000 zet chuan a hmunah inkhel an lo en tawh.

League Cup final-a Tottenham Hotspur leh Manchester City an inkhelh khan fans 8,000 zet chuan a hmunah an lo en tawh bawk a, City leh Spurs fan-te chu ticket 2,000 ve ve pek an nih laiin ticket 4,000 chu UK National Health Service staff-te leh Wembley chhehvela awmten an insem bawk.

FA Cup final hi ruahman anga mipui 20,000-in a hmunah an en thei a nih chuan Covid-19 vanga UK sorkarin inkharkhip a kalpui hnua a hmuna infiamnaa entu an tam ber ṭum a ni ang.

Chelsea hian FA Cup-ah nomawi an chawi thei a nih chuan an vawi kua champion-na tur a ni dawn a, record ṭhat lamah Arsenal (14) leh Manchester United (12) chiah an phak dawn lo.

Hetihlai hian an khingpui tur Leicester City erawh kum 52 chhunga a vawi khat nan FA Cup final-ah an inlan dawn a, an chak chuan he inelnaa an nomawi hmasa ber a ni ang - team pahnih hi Premier League top four lama inel mek an nih bawk avangin inkhel a hmuhnawm ang.

UK sorkar chuan May 17 aṭang khian infiamna stadium-a mipui 10,000 emaw stadium-a leng zat 25%, hemi pahniha a tlem zawk ang zelin a hmunah inkhel en an phal dawn a, Premier League round tawp lam pahnihah fan-ten a hmunah inkhel an en thei dawn tihna a ni.