Hertha tan chak a ngai

Zanin dar 9:30-ah Bundesliga match pawimawh a awm dawn a, relegate tawh Schalke O4 chuan tla thei dinhmuna ding Hertha Berlin an mikhual dawn - Hertha tan season thara Bundesliga khelh chhunzawm turin chak a pawimawh.

Bundesliga-ah team 18 an awm a, a hniam lam pahnih hi 2.Bundesliga-ah an tla thla ṭhin. Table-a 16-na chuan 2.Bundesliga-a pathumna nen promotion play-off an khel ṭhin thung.

Hertha hi table-ah 14-na an ni mek a, 15-na Werder Bremen leh 16-na Arminia Bielefeld-te nen point 31 ṭheuh an nei mek a, match khatin an khel tlem tih erawh hriat tel a ṭha.

Hertha hian zaninah hnehna an chan chuan an him tawh ang hiala sawi theih an ni dawn tihna a ni a, khelh chhan tur nei tawh lo Schalke lakah point thum hlawhchhuah ngei an tum ang.

Hetihrual hian mid-fielder pawimawh Sami Khedira chu zaninah chhawr theih a nih a rinawm loh a, Rune Jarstein, Dodi Lukebakio leh Marvin Plattenhardt-te Covid-19 vangin an inlan thei dawn lo a, Luca Netz leh Arsenal aṭanga loan-a an hawh Matteo Guendouzi-te chu hliam vangin season tawp thlengin an inlan a beiseiawm tawh lo.

Tun season-a goal riat khunga, Hertha top scorer ni mek Matheus Cunha dinhmun a chiang lo a, Schalke lam hian Mehmet Aydin, Benjamin Stambouli, Omar Mascarell, William da Silva, Hamza Mendyl, Nassim Boujellab, Matija Nastasic leh Kilian Ludewig-te an chhawr thei dawn bik lo.

Chutihrual chuan Klaas Jan Huntelaar hi inkhel thlak danglam turin a la ṭha tawk reng a, hrem vangin Mark Uth inlan thei dawn lo mah se goal nga khung tawh Matthew Hoppe an nei bawk.