Atletico tan point hloh a thiang tawh lo
Zanin dar 1:30-ah Atletico Madrid chuan league match khel turin Real Sociedad an mikhual dawn a, Diego Simeone-a naute tan point hloh a thiang tawh lo.
La Liga-ah league match thum chiah khelh tur a awm tawh a, Atletico hian he thu buatsaih a nih lai hian point hniha sang fal chungin hma an hruai mek. Nizan khan point hniha Atletico thlautu Barca an inlan a, an chak chuan match khata khel tam chungin point khatin Atletico an tlanpel ang - he thu buatsaih a nih lai hian result kan hre hman lo.
La Liga-ah Atletico, Real Madrid leh Barca-ten champion an la beisei vek a, Atletico vanneihna chu an kutah engkim a la innghat - an hmabak match thumah hian an chak vek chuan an champion dawn.
A rei lua e
Atletico Madrid-in La Liga nomawi an chawi hnuhnun ber chu 2013-14 season kha a ni a, European football-a club sum seng na ber pawl Barcelona leh Real Madrid rorelna kara nomawi chawi an nih avangin fak pawh an hlawh hle.
Diego Simeone enkawlna hnuaia league nomawi an chawi season-ah hian Champions League final an lut bawk a, a hnuah erawh team ṭha zinga chhiar tel ni reng mah se Atletico-in inchhuanna tham nomawi an chawi lo.
Champions League (2015-16) final an lut leh a, Europa League (2017-18) nomawi an chawi bawk. Simeone hoa league nomawi an chawi season en ila, Atletico hian player sawi vul chuk tur an nei lo hle.
La Liga an champion season-ah hian Diego Costa chuan inelna hrang hrangah match 52 khelin goal 36 khung mah se Atletico siam len striker a ni a, David Villa hming langsar viau mah se Barcelona-a chuai tawh lam an lak a ni.
Tichuan...
Atletico hian an champion season-ah hian sawi tur ting chuan Thibaut Courtois (free), Miranda (free), Diego Godín (pound maktaduai 6.6), Koke (free) leh Arda Turan (euro maktaduai 12)-te an nei tel bawk a, mahse, a sum ang zawnga thlir chuan khukpui hluai tham an ni lo.
Hetihlaia Atletico nomawi chawiin fak a hlawh lehzual chhan pakhat hi sum an hman tlem vang a ni a, tunah erawh a ni tawh bik lo - Barca leh Real ang emin inseng lo mah se Simeone hi khawvela coach hlawh hnem ber pawl a ni tawh a, an player-te man pawh a to hlawm hle.
Tlarhmaa an chhuanvawr João Félix hi pound maktaduai 113 man a ni a, Portuguese forward man zat ringawt hi team pangngai tak dinna tham a ni. Midfielder Thomas Lemar hi pound maktaduai 60 chuang man a ni a, tun hnaia season duhawm tak hmangtu Marcos Llorente hi pound maktaduai 35 man a ni.
Kieran Trippier hi pound maktaduai 20 man, a khelh ṭhat dan a zira a man sang chho thei tur a ni a, pound maktaduai 20 chuang man Renan Lodi pawh hi a man a tlawm lo hle - pound maktaduai 58 man Álvaro Morata chu loan-in an chhuahtir mah mah!
A hun tawh
A tawi zawnga sawi chuan, 2013-14 season La Liga-a an champion-in nasa takin Atletico a siam lian a, player pawh an it zawng an hlah tawh bik lo - mahse, an duh ber La Liga leh Champions League nomawi an chawi thei tlat lo.
Simeone-a'n khawvel coach ṭha zinga a hming nem kai a duh a nih chuan tun season-ah a champion ngei a ngai tawh a, tun season-a hun tam zawk hma an hruaina league-ah hian nomawi an thlauh a nih ngat chuan Argentine coach leh a naute an mualpho khawp ang.
Mualphona pumpelh turin Simeone leh a naute tan hmabak match thuma chak mai a tawk a, mahse, zanin aṭangin a awlsam lo nghal dawn - an hmachhawn tur hi Real Sociedad an ni tlat.
La Liga table-a pangana dinhmun luah mektu Real Sociedad hi league-ah pangana an ni mek a, season thara Europa League khelh beisei an ni. European football-a an dinhmun tichiang turin match thum aṭanga point ruk neih an mamawh a, Atletico lakah tha an thlah lo ang.
Tute nge inlan dawn?
Atletico tan tlarhmaah chhuanvawr Luis Suarez chuan league match li zet a zawnin goal-a khung tawh lo a, tun season-a goal 19 khung tawh striker hian a hun tawn duhawm lo thai bo turin Sociedad lakah khung ngei a tum ang.
Hetihlai hian Lemar leh Lodi-te chu hliam vangin an inlan theih a rinawm loh a, centre back Jose Gimenez chu he thu buatsaih a nih thleng hian a dinhmun a la chiang lo bawk.
Real Sociedad tan midfielder pawimawh Mikel Merino-a la dam thei lo a, midfielder Carlos Fernandez leh left back Aihen Munoz dinhmun a la chiang lo a, centre back Igor Zubeldia erawh inlan thei tawh tura beisei a ni.
Sociedad hian tun season league match 30-a khelha goal 11 leh assist pasarih nei thei Mikel Oyarzabal an kawl a, league goal 14 khung tawh Alexander Isak, midfielder thiam bik David Silva leh winger Adnan Januzaj an la neih bawk avangin Atletico tan zuam sual theih an ni ang.
