India-in WTC final khel tur squad an puang

ICC World Test Championship final chu June 18 khian Rose Bowl, Southampton-ah India leh New Zealand ten an khel dawn. BCCI-in Black Caps hmachhawn tur player 20 awmna squad an puang.

Eng nge WTC?
WTC hi a vawi khatna a ni a, Test cricket-in ngaihven a hlawh theih nan International Cricket Council (ICC)-in an buatsaih a ni. Tuna final khelh tur hi August 1, 2019 aṭang daih tawh khan khelh ṭan a ni a, team tin hian Test match-a an result ang zelin point an hmu.

Test khel ram zawng zawng an tel vek a, ram ṭha pakua Australia, Bangladesh, England, India, New Zealand, Pakistan, South Africa, Sri Lanka leh West Indies te an tel. Ranking hnuai lam pathum Afghanistan, Ireland leh Zimbabwe te an tel lo thung.

Final turte hi
India hian August 1, 2019 - June 22, 2021 chhungin series vawi ruk an khel hman a, vawi nga chakin vawi khat an chak lo. Men in Blue hian match vawi 17 an khel a, vawi 12 chakin vawi li an chak lo a, vawi khat an inhnehtawk. Virat Kohli leh a hote hian point 520 an hmu.

League table-ah India hi pakhatna an ni a, New Zealand-in point 420 an hmu thung. Black Caps hian series nga an khelh aṭangin vawi thum an chak a, vawi khat chak loin vawi khat an inhnehtawk bawk. Series nga chhungah hian match 11 awmin vawi sarih an chak a, vawi li an chak lo.

India an ṭha
India hian Australia ramah Test series an la thei a, an ramah England an hneh leh bawk. Australia rama hnehna an chan ṭum hian ram tana la khel tam lo bowler Washington Sundar leh Shardul Thakur te an che ṭha a, England an hneh ṭumin bowler thar Axar Patel leh tawnhriat nei ṭha Ravichandran Ashwin te an che ṭha viau bawk.

Tun hmaa India ṭhat lohna bowling-ah pawh Virat Kohli hote an ngaihtuah awm lo a, batting lam erawh an ṭhatna sa a nih avangin Kane Williamson-a captain-na hnuaia khel New Zealand hneh thei turin an ṭha tawk ang.

India Squad chu
Squad: Virat Kohli (C), Ajinkya Rahane (VC), Rohit Sharma, Shubman Gill, Mayank Agarwal, Cheteshwar Pujara, Hanuma Vihari, Rishabh Pant (WK), R Ashwin, Ravindra Jadeja, Axar Patel, Washington Sundar, Jasprit Bumrah, Ishant Sharma, Mohammed Shami, Mohammed Siraj, Shardul Thakur, Umesh Yadav