FIGC-in Juventus an vau

Italian Football Federation (FIGC) president Gabriele Gravina chuan Juventus chu European Super League (ESL) aṭanga an inhnukdawk lo a nih chuan Serie A aṭanga paihchhuah theih an nih tur thu a sawi.

ESL awm tur thu hi April 18 khan puan a ni a, ni hnih hnuah a zuih ral. A tira team tel 12 te chu Real Madrid, Barcelona, Atletico Madrid, Manchester United, Manchester City, Liverpool, Arsenal, Chelsea, Juventus, AC Milan leh Inter Milan te an ni a, amaherawhchu dodalna a nasat em avangin club pakua an inhnukdawk.

Real Madrid, Barcelona leh Juventus ten an la ṭang khawng tlat a, May 8 khan thuchhuah inṭawm siamin kaltlangpui zel an tum thu an sawi.

Europe club lian pathum hi inhrosa viau mah se UEFA leh FIFA duh loh dana kal an nih miau avangin hremna na zawk tuar thei an ni a, FIGC pawhin Juventus hi an inhnukdawk lo a nih chuan an chungah hremna an lekkawh tur thu an sawi.

Gabriele Gravina chuan, "Juventus hian dan an zawm lo a nih chuan Serie A aṭangin an chhuak ang," tiin a sawi.

Italy ramah national championship tel tura inziahluh hun tawp chu June 21 a ni a, Old Lady hian Serie A khelh an duh a nih chuan hemi hma hian ESL aṭangin an inhnuhdawh a ṭul dawn a ni.