Man United-ah Cavani a cham dawn

Manchester United chuan striker tawnhriat nei ṭha Edinson Cavani chu season khat dang cham turin contract an pawhseisak. Uruguayan striker hian June 2022 thleng Old Trafford-ah a cham ang.

El Matador hming lem an pek Cavani hi Covid-19 leh hliam vangin khel tam tawk lo mah se Man United-ah hmun pawimawh a chang a, Ole Gunnar Solskjaer-a'n 'number 9 role' chelh turin Cavani aia ṭha a nei lo.

Kum 34 mi Cavani hian league match 23 aṭangin goal kua a khung a, tun season-ah inelna hrang hrang match 35 aṭangin goal 15 a khung tawh.

Tun hnaiah Cavani hi a che ṭha lehzual. Man United tana a match hnuhnung pasarihah goal riat khungin assist vawi thum a nei. Europa League-ah match hnuhnung pathumah goal nga a khung a, semifinal-a Roma an hneh ṭum khan first leg leh second leg-ah goal hnih ve ve a khung.

PSG striker hlui Cavani chuan, "Ka hming lama an zai hian nuam ka ti. Mak ve deuh chu fan-te aṭangin ka hre hmasa ber lo. Kan 'kit man' hian training tura ka paltlang apiangin min zaisak ṭhin. A pahnihnaah chuan chhung rilah ka hlim a, chuvangin Man United-a cham hi ka duh," tiin a sawi.

Manchester United manager Ole Gunnar Solsjkaer chuan, "Edinson hi training-naah pawh bang tlai ber zinga mi a ni a, player naupang zawkte tan entawn tur a hnutchhiah. Amah hi mimal tak pawhin cham turin ka duh a, fan-te pawhin an duh a ni," tiin a sawi. Nizan khan United hian Leicester an hmachhawn a, result kan hre hman lo.