Premier League aṭangin Fulham an tla thla

Premier League aṭanga tla tur a hriat kim ta. Thawhṭanni zan khan Fulham-in an mualah Burnley 2-0 in an hneh lo a, West Brom leh Sheffield United hnung zuiin season tharah Championship-ah an khel dawn.

Craven Cottage-ah Burnley tan Ashley Westwood leh Chris Wood ten goal an khung a, Fulham-in a chhanletna an nei lo. League match thum khelh tur a la awmin Championship-a tla tur club pathum a hriat vek a, Premier League aṭanga tla tur hriat kim hma ber ṭum a ni.

Goal hnih chu
Burnley midfielder Josh Brownhill-a'n minute 35-naah ṭha zetin ball a vawrhlut a, Czech forward Matej Vydra-a'n pet nghal mai loin chep tak kar aṭangin ṭhazeta a lakluh bakah a cross nghal. Clarets midfielder Ashley Westwood-a'n awlsam takin a khung.

Minute 44-naah jersey number 9 Chris Wood-a'n striker ṭha tih ṭhin dan angin box pawn chiah aṭangin kawh zetin Burnley goal hnihna a volley lut. First half-ah Burnley-in 2-0 in hma an hruai.

Second half-ah Fulham winger Ivan Cavaleiro-a'n penalty a beisei a, pek a ni lo. Chutihrualin Cottagers keeper Alphonse Areola pawh Clarets forward Vydra ti tlu mah se hnawhchhuah a ni lo.

Fulham-in an nawr chhunzawm a, Cameronian midfielder Andre-Frank Zambo Anguissa-a'n crossbar pet per dawp mah se a goal loh avangin minute 90 chhungin goal an khung lo - Burnley 2-0 in an chak.

Parker-a ngui
Fulham boss Scott Parker chuan, "Kan relegate dawn tih chu a hriat lawk theih a, mah se a thlen meuh chuan a hrehawm a, a na ngawih ngawih. Tun season-ah hmasawnna tam tak kan nei a, mahse a ṭha tawk lo a ni," tiin a rilru a nat thu a sawi.

English manager Parker chuan sawi chhunzawmin, "Tling, tla, tling, tla hi kan kalsan a ngai. Chutihrualin tun hi kan hmalak dan tur sawi hun a ni lo. A pumpelh dan chu ka hre chuan ka hria a, sawi a rem rih lo," tiin team nghelnghet din a ṭul thu a sawi.

Cottagers hi 2018 khan Premier League khel turin an tling a, season khat hnuah Championship-ah an tla lehnghal. Kum 2020 khan Scott Parker-a ho hian Premier League khel turin an tling leh a, season khat bak an daih ta chuang lo.

Relegate pathum a chian tak avangin point 37 hmuin Southampton leh Brighton & Hove Albion te an him phah a, Burnley pawhin hnehna an chan avangin point 39-in an him ve bawk.

Thlirna Tawi

• Premier League match thum chauh khelh tur a awm tawh tihin tla hniam tur pathum a chiang vek tawh. Fulham, West Brom leh Sheffield United an tla.
• Fulham : Kum 2001 khan Premier League khel turin an tling a, kum 2014-ah an tla. Kum li zen zawn Championship an khelh leh hnuin kum 2018 khan Premier League khel turin an inpetling leh a, amaherawhchu English football inelna sang berah hian season khat chiah awmin an tla lehnghal. Championship-ah kum khat an awm hnuin Premier League khel turin an inpetling leh a, season khat bak an daih ta chuang lo.
• West Brom : Baggies hian kum 2002 khan Premier League an khel ṭan a, chutihrualin 2006–07, 2007–08 leh 2009–10 season khan Champonship an khel. Kum 2018 khan Premier League aṭangin an tla a, Championship-ah season hnih an awm hnuah Premier League khel turin an tling a, season khat chauh hnuah an tla lehnghal.
• Sheffield United : Premier League ṭantirh khan Blades hi an tel nghal a, season hnuah tlain 2006–07 khan Premier League rawn khel leh zawkin Championship-ah an tla lehnghal. Sheffield hi 2011 aṭanga 2017 kha League One-ah an awm hial a, Championship-ah season hnih awm lehin Premier League khel turin kum 2019 khan an inpetling a, season hnih an awm hnuah an tla.
• Nikum khan Championship aṭangin Leeds United, West Brom leh Fulham te Premier League khel turin an inpetling a, Marcelo Bielsa kaihhruai Leeds chiah an inhamtang.
• Tun season Championship-ah Norwich City an champion a, pahnihna Watford nen Premier League an khel dawn. Hmunruak pakhat hi Brentford, Swansea City, Barnsley leh Bournemouth ten playoff hmangin an zawng ang.
• Season liam ta khan Premier League aṭangin Norwich City, Watford leh Bournemouth te an tla hniam leh a, season tharah team ngai chiah chiah hi rawn let leh thei dinhmunah an ding.