Derby tan playoff a hnai

Manchester United ngam loa FA Cup-a tlawm hlim Derby County chuan Inrinni zan khan 3-0 ngawtin Blackburn Rovers an sawp a, Championship playoff khel turin an dinhmun an siamrem zel. 

Derby tan hian Chris Martin chuan goal hnih khungin Louie Sibley chuan goal khat a khung bawk a, kum 31 mi striker Martin-a goal hnuhnung zawk hi penalty aṭanga lut a ni. Championship-ah pakhatna leh pahnihna chu automatic-in Premier League khel turin an tling ṭhin a, pathumna aṭanga paruknain playoff hmunruak an inchuh ṭhin thung.

Derby hi table-ah 12-na ni daih mah se parukna Preston North End an thlauhna hi khelh zat inangah point nga chauh a ni a, Wayne Rooney khelhna team hian season thara Premier League khelh an la beisei ve zel. 

Rooney hi Blackburn lakah a inlan lo a, Derby boss Phillip Cocu chuan a player pawimawh inlan theih loh chhan hi hliam tenau vang a nih thu a sawi. Championship-ah hian Inrinni zana 2-0 a Huddersfield Town hnehtu Leeds United chu hmahruaitu an ni a,  West Brom-in point khata phak loin pahnihna an ni.