Premier League champion Manche5ter City

Manchester City chu a vawi nga nan Premier League champion an ni a, Chelsea nen an champion zat a inang der! Pep Guardiola hnuaia an vawi thum an champion-na a ni bawk.

Man City-in nomawi chawi phu mah se champion an nemngheh dan erawh duhthusam a ni lo. Thawhlehni zana Manchester United-in Leicester City 2-1 a an hneh loh avangin an champion.

Pep Guardiola hote hian point 80 an hmu a, match thum khelh hmabakah Man United hian an umpha thei tawh lo. Man City hian tun season-ah Premier League leh League Cup an champion tawh a, Champions League final khelh tur an la nei bawk.

A awlsam lo
Manchester City hi English football inelna sang bera vawi sarih an champion-na an ni a, Premier League bikah kum kua chhung lekin vawi nga an champion.

Pep Guardiola chuan, "Season dang ang a ni lo, tun season hi Premier League champion har ber ṭum a ni. Kan champion dan hi kan thlir let ang a, kan hre reng tawh ang. Team enkawltu ka ni hi vannei ka inti hle.

"Ka naute hi ka chhuang hle. Inkhuahkhirhna dan hrang hrang a tam a, chutiang harsatna karah chuan ni tinin hlawhtlinna chan tumin theihtawp an chhuah a, hmasawn zel an tum a, an tum a ruh em em a ni," tiin a naute a fak hle.

Premier League harsatzia sawi zuiin Pep chuan, "Spain leh Germany-ah team enkawl tawh a, Premier League hi a hautak fal ber. Heta ṭang ringawt pawh hian club chhungkuaa mitin pawimawhzia a lang chiang hle," tiin a sawi.

Mipui 10,000 hmaah
Liverpool-in Premier League nomawi an chawi khan fans an awm lo. Jurgen Klopp-a hoten season ṭha bik an hmang a, Reds-in a vawi khat nan Premier League nomawi an chawi avangin awlsam tein stadium chhung leh a chhehvela mipui nuai khat punkhawm a harsa lo ang.

Mahse Covid-19 vangin supporter an pungkhawm thei lo a, an vanduai hle. Manchester City erawh nomawi an chawi hunah Etihad Stadium-ah mipui 10,000 in an thlir thei dawn. British prime minister Boris Johnson chuan May 17 aṭangin entu 10,000 awm theih thu a puang tawh.

Manchester City hian May 23 hian Premier League season kharna inkhelah Everton an mikhual dawn a, nomawi chawina hun ṭha a ni ang.

Pep Guardiola leh Nomawi
Pep Guardiola hian a kalna apiangah inelna a thunun a, Barcelona aṭanga bul ṭanin La Liga chauh ni loin European football an thunun. Bundesliga team ṭha ber Bayern Munich enkawl lehin season thum chhungin league nomawi vawi thum a chawi ringawt lo a, record ṭhahnem tak an siam.

Football zirchiangtu eng-emaw zatin Spain leh Germany-in 2010 leh 2014 World Cup an champion chhan pakhatah Guardiola hi an ngai hial. European football-a team intluk tawkna ber ang hiala an sawi Premier League-ah a zuanglut a, team ṭha zinga mi Manchester City a enkawl a, season hmasa berah 2016-17 ah nomawi pakhatmah a chawi lo.

Mahse Pep-a'n a theihna a lang chho a, tharum hmanna hmunah player lian lo David Silva leh Phil Foden te rinrawla hmangin English football a thunun thei tlat! Kum 50 mi Guardiola hnuaiah Spanish player Xavi leh Andres Iniesta te an par vul tawh a, India rama FIFA Under 17 World Cup-a best player Foden tan Spanish manager hnuaia a khel thei hi malsawmna a ni. Pep-a hnuaiah Man City-in league nomawi vawi thum a chawi ta a, amaherawhchu manager ropui Guardiola hian hmabak a la nei.

Barcelona leh Bayern Munich manager hlui Guardiola hian Champions League final-a Chelsea hneha European champion an nih a la ṭul a, London club laka an vanduai a nih chuan Spanish manager ropuina tur hi hliah khuhin a awm ang.

Barcelona - 14
La Liga 3 (2008–09, 2009–10, 2010–11)
Copa del Rey 2 (2008–09, 2011–12)
Supercopa de España 3 (2009, 2010, 2011)
Champions League 2 (2008–09, 2010–11)
UEFA Super Cup 2 (2009, 2011)
FIFA Club World Cup 2 (2009, 2011)

Bayern Munich - 7
Bundesliga 3 (2013–14, 2014–15, 2015–16)
DFB-Pokal 2 (2013–14, 2015–16)
UEFA Super Cup 1 (2013)
FIFA Club World Cup 1 (2013)

Manchester City - 11
Premier League 3 (2017–18, 2018–19, 2020–21)
FA Cup 1 (2018–19)
EFL Cup 5 (2017–18, 2018–19, 2019–20, 2020–21)
FA Community Shield 2 (2018, 2019)