Man United-in Liverpool Champions League kawngka an kharsak?

Ole Gunnar Solskjaer-a'n zanin dar 12:45-a an hmachhawn tur Liverpool leh Jurgen Klopp-a hote dinhmun hre ranin Leicester City hmachhawn tur player a thlang a, Thawhlehni zan khan Manchester United-in an mikhual Foxes 2-1 in an hneh lo.

Old Trafford-a inkhelah Brendan Rodgers-a hoten Luke Thomas hmangin minute 10-na lekah an khung a, Mason Greenwood hmangin Man United-in minute nga hnuah an sut. Foxes tan Caglar Soyuncu-a'n minute 66-naah chakna goal a khung a, Champions League an hnaih sawt.

Duhthlanna ngeiawm
Man United leh Leicester inkhel tur hi Foxes ṭantute ang thoin Liverpool ṭantute an ngaihven. A chhan chu, Solskjaer-a hoten hnehna an chang a nih chuan Reds tan UCL khelhna kawng a inhawng zau dawn.

Mahse maw, Man United leh Liverpool inhalzia hrechiang ber zinga mi Solskjaer-a'n player a rawn thlak hlawk. United tana bul ṭantu zingah Premier League-a la inlan ngai reng reng lo Amad Diallo leh Anthony Elanga te an tel.

Player dang pariat pawh David de Gea, Eric Bailly, Axel Tuanzebe, Alex Telles, Brandon Williams, Donny van de Beek, Nemanja Matic leh Juan Mata te an ni a, khelhna hmun an chang mumal lo vek. Tlarhmaa mal tlat Mason Greenwood erawh tun hnaiah player pawimawh ni chho mah se kum 19 mi chauh a la ni.

United tana bul ṭantute league-a an khelh zat chu minute 6,654 chauh an ni a, match 34-ah minute 33,660 khelh tur a awm a, Foxes laka bul ṭantute hi league match 19.76% ah chiah tha an thawh. Chutihrualin inkhel pawimawh tawk loa an inlan ṭhin avangin an khelh zat minute ai hian an hlutna hi a la hniam a, lung dam takin B Team tia chhal theih an ni ang.

Solskjaer-a thutlutkna avangin ṭan hma hauhin chak tur a rin thiam theih a, Liverpool ṭantute tan pawm thiam theih chi a ni lo. May 2, 2010-a Steven Gerrard-a'n Chelsea an champion theih nana Didier Drogba a pass sual 'palh' hretu Man United ṭantute erawh Norwegian manager thutlukna avangin an hlim ang.

A insawifiah
Man United hian ni riat chhungin match li khelh tur an nei a, Europa League semifinal-ah team ṭha khelhtirin AS Roma lakah 3-2 in an tlawm. Amaherawhchu, first leg-ah 6-2 a an chak tawh avangin final an lut tho.

Roma zawhah Aston Villa hmachhawnin Solskjaer-a'n team ṭha bawk a khelhtir a, 3-1 in an chak. Solskjaer-a'n ni nga chhunga match thum khelh tur a awm avangin loh theih loin player thlak hlawk a ṭul tur thu a sawi lawk.

Leicester City an hneh loh zawhah Solskjaer chuan, "Inkhelh hma ni leh inkhelh ni chawhma lamah hun rei lote chauh training kan nei thei a, kan inkhelh ṭantirhah pawh kan khelah a lang," tiin a sawi a, goal khungtu Greenwood leh a siamsaktu Amad Diallo a fak.

Solskjaer-a'n player duh ang thlang thei turin season tharah Champions League an khel dawn chiang tawh a, Sir Alex Ferguson-a hnua Man United-in kum zawna UCL an khelh lehna hmasa ber tur a ni.

Foxes an lawm
Point thum hmu turin Leicester City an thawkrim a, Luke Thomas-a goal mawi zet chu United keeper David de Gea tan dan rual a ni lo. Chutihrualin Caglar Soyuncu chakna goal khung erawh dan theih a ni.

Solskjaer-a'n Marcus Rashford leh Edinson Cavani te a luhtir hnu lawkah Foxes-in goal an khung. Soyuncu hi Rashford-a venna aṭangin a tal chhuak a, Matic-a'n Turkish defender dang turin tha a thawh tawk lo bawk.

Leicester manager Brendan Rodgers chuan, "Kan khelh dan leh kan result-ah kan lawm takzet. Newcastle nen kan inkhelh ṭuma kan khelh chhiat avangin Manchester United laka kan khelh danah ka lawm lehzual a, ka player-te pawh ka lawmpui," tiin a sawi.

Reds daltu United?
Liverpool hi an dinhmun ṭha lo viauin lang mah se Foxes leh Chelsea fixtures thlirin Champions League khelh hi an kutah a la awm ang hialin a chhal theih. Amaherawhchu Manchester United bawk hian an beiseina titawp turin sa huai an ser dawn.

Solskjaer-a'n Foxes laka a player dah ṭhat Edinson Cavani, Bruno Fernandes, Paul Pogba leh Luke Shaw te ho a rawn chhawr a rinawm. Old Trafford ngeia Reds Champions League beiseina tihtawp hi a hlu dawn a, inkhel an la thutak khawp ang.

Chutihrualin Man United hi an kim tak avanga chak ngawt tura dah a rem lo. Liverpool hi season liam ta champion an ni a, Jurgen Klopp-a hote hi kum khat liam ta kha chuan Europe team ṭha ber ang hiala sawi an ni.

Reds hian an match hnuhnung berah Southampton 2-0 in an hneh a, an champion ṭuma an player pawimawh Mohamed Salah, Sadio Mane leh Roberto Firmino te an dam ṭhat bakah Thiago leh Diogo Jota te an neih belh.

Amaherawhchu Liverpool hian Virgil van Dijk awm loh hnuah an vanglai an pha leh tawh lo a, captain Jordan Henderson inhliamin an harsatna a belhchhah bawk. Premier League champion tur a hriat takah chuan zanina Manchester United leh Liverpool inkhel tur hi league match en châkawm bera sawi theih a ni.

Tuten nge UCL khel dawn?
• Champions League khel turin Manchester City leh Manchester United te an tling tawh a, hmunruak pahnih a la awm.
• Leicester City : Brendan Rodgers-a hoten FA Cup final-ah Chelsea (May 15) an hmachhawn dawn a, chumi zawhah Chelsea (May 18 zan) leh Tottenham Hotspur (May 23) te an hmachhawn dawn. Foxes hi pathumnaah awmin an dinhmun ṭha viauin lang mah se UCL khel chiang tur chuan point li an la mamawh a, vanduai thei an la ni.
• Chelsea : Thomas Tuchel-a hote hian point ruk an la mamawh a, nizan khan Arsenal an hmachhawn. Blues hian FA Cup leh Champions League final khelh tur an la nei a, Leicester City (May 18 zan) leh Aston Villa (May 23) te nen an la inkhel dawn. London club hi a sang pali zingah an la awm chiang lo a, an awm ta lo a nih chuan Europe inelna sang ber khel turin Champions League nomawi chawi a ṭul ang.
• West Ham United : David Moyes-a hote hian Brighton (May 15 zan), West Brom (May 19 zan) leh Southampton (May 23) te an la hmachhawn dawn a, top four tura an elpuite nen an inkhelh dawn loh avangin an chak vek a nih chuan UCL khelh theih dan a awm a rinawm.
• Liverpool : Jurgen Klopp-a hote hi paruknaah awm mah se match li khelh tur an la nei. Reds hian Man United (zanin), West Brom (May 16), Burnley (May 19) leh Crystal Palace (May 23) te an la hmachhawn dawn a, an chak vek a nih chuan UCL khelh a beiseiawm hle.
• Tottenham Hotspur : Ryan Mason-a hote hian Wolves (May 16), Aston Villa (May 19) leh Leicester City (May 23) te an la hmachhawn dawn. Spurs tan Champions League khelh a harsa tawh dawn a, amaherawhchu Hammers leh Reds-te kawng sialtu an la ni thei ang.