Barcelona tan champion nomawi a hla ta

La Liga champion ni turin Barcelona tan chak loh a thiang tawh lo a, Thawhlehni zana an result erawh 'draw' a ni - Catalan club hian champion an duh lo emaw tih mai a awl hial!

Barcelona hian khualmualah team vantlang Levante an lenchilh a, 3-3 in an inhnehtawk. Barca hi Lionel Messi leh Pedri-ten 2-0 in hma hruaipui hman mah se Levante-in Gonzalo Melero leh Jose Luis Morales hmangin an chhanglet a, 2-2 a ni.

Catalan club tan Ousmane Dembele-a'n goal khat a khung ve leh a, mahse, hei pawh hi Sergio Leon chuan hun tawp nan minute sarih chauh a awm tawh tihin a chhanglet leh a, 3-3 in inkhel a tawp.

Barca-in hnehna an chan zawh loh avangin Real Madrid chu point khat lekin an tlansan a, hmahruaitu Atletico Madrid chu point khatin an la thlau cheu bawk. Nizanah Atletico an inlan avangin he thuziak i chhiar meuh chuan an inthlauhna hi a danglam leh tawh mai thei.

Mamawh inang lo
Barcelona-in La Liga nomawi chawi turin an hmabak match thumah chak vek an mamawh a, Atletico leh Real chetsual chan tel a ngai bawk - hei hi Levante an hmachhawn hmaa an dinhmun a ni.

Levante-in league match thum khelh tur an la neihah him turin point khat hmuh an mamawh thung a, Barca laka point khat an hlawhchhuah theih chuan division hniam lamah an relegate dawn lo tih a chiang thei.

Team inthlau tak, point thum mamawh ve ve an inkhel a, a tir lamah rin ang ngeiin Barca lamin an nawr zawk - minute 25-naah Jordi Alba cross aṭanga ball kal chu Messi-a'n mawi zeta volley chungin a khung a, tun season inelna hrang hranga goal 37-a khungna chiah a ni.

Barcelona-in an duhtawk mai lo - minute 34-naah Dembélé-a'n ṭha taka ball a lakluh hnuin Pedri tan a siamsak a, kum 18 mi Spanish midfielder tan goal ruaka khung a harsa tawh lo.

Koeman thutlukna
Levante-in chance nei ve bawk mah se Barcelona-in first half-ah inkhel an thunun a, 2-0 a hma an hruai bawk avangin Ronald Koeman-a team hi awlsam takin an chak mai dawn niin a lang.

Mahse, second half-ah Barca tan thil pawi a thleng. Hliam vangin centre back Ronald Araujo-a'n second half-a khel thei lo a, a aiah tlarhnung laia khel ngai lo full back Sergi Roberto-a luhtir.

Minute 57-naah Roberto a mualpho zui a, Jorge Miramon-a cross aṭanga ball kal chu a ven zawh loh Gonzalo Melero chuan si phurh sutna goal ni turin a tauh lut a, Barca an hawihai.

Levante an phur laklawh. Minute hnih a liam a, Messi-a'n holam taka ball a hloh aṭangin Roger Marti leh Jose Luis Morales-te mawi takin an in one-two a, Morales-a'n Marc Andre ter Stegen man theih loha mawi taka volley goal-in 2-2 a ni.

An tho...leh lo!
Minute 64-naah Barca-in an goal thumna an khung a, Messi thawhrah bawk a ni. Argentine forward hian Antoine Griezmann tan a siamsak a, hei hi Levante right back Jorge Miramon chuan laksak a lo tumna lamah Dembele ke bulah a chhawpsak.

French forward-in harsatna nei loin goal-ah a pet a, a goal chiang hle - VAR rawn zui a ni a, mahse Griezmann-a'n Miramon-a ti tlu lo tih a lan chian hnuah pawmsak an ni a, Barca hi chak tawh mai tura ngaih an ni.

Mahse, Levante an beidawng tlat lo. Barca substitution fuh lo bawk a lang nawn a, bench aṭanga luhtir Sergino Dest-a'n Tono a veng fuh tawk lo a, Tono cross aṭanga ball kal chu Gerard Pique ven hneh loh Leon chuan a khung a, 3-3 in inkhel a tawp.

Barca boss Koeman chuan, "Second half-ah kan tha tho tawk lo a, first half-a inkhel kan thununzia ka ngaihtuahin chawhlawkah khan eng nge tihsual ka neih, ka hre lo. Goal thum hmangin min barakhaih a, sawifiah theih ka nei lo," a ti!

Hmabak chu
La Liga champion beisei zinga mi Real Madrid chu zanin dar 1:30-ah an inlan dawn a, khualmualah Granada an lenchilh ang - Real hi an chak a nih ngat chuan Barca tan champion beiseina chu mangṭha a fuh zawk ang.

Hetihlai hian hmahruaitu Atletico Madrid chuan nizan khan Real Sociedad an mikhual a, he thu buatsaih a nih lai hian result kan hre hman lo.

Diego Simeone-a naute hi an chak a nih chuan zaninah Real chak zo lo pawh ni se Barca tan league nomawi beisei a harsa tawh ang - match hnih chiah khelh tur a awm tawh tlat!

Barca hian Celta Vigo leh Eibar an la hmachhawn dawn a, Catalan club hian nomawi an chawi ta lo a nih chuan Paris Saint-Germain nena sawizawm Messi mangṭha tura an inbuatsaih tel a ṭul ang.