Djokovic a insum zo lo leh tawh

Tennis khelh laklawh laiin Novak Djokovic a insum thei lo fo. Thawhlehni zan Italian Open inkhelah pawh world number 1 hian ruah sur vangin umpire Nacho Forcadell chu thinrim takin a an khum leh chiam.

Rome khawpuia inkhelah, inkhel a zawh hmain ruah a sur a, mahse inkhel hi tihtawp nghal a ni mai lo. Serbian star hian inkhel endiktu hnenah, "Engtia rei nge min khelh luih tir i tum? Vawi thum ka sawi tawh, mahse i rawn endik bawk si lo," a ti.

Inkhel hi a hnuah darkar thum chuang tihtawp lailawk (suspend) a ni a, second round inkhelah hian Djokovic-a'n a khingpui Taylor Fritz chu 6-3, 7-6 (7-5) in a hneh hram a, inkhelh banah a thinrim a insum zo lo tih hi a zep lo.

Djokovic chuan, "Tun ṭum hi thil vawi khan a thlenna a ni tawh lo, a la thleng leh a nih pawhin a mak lo. Zirlai ṭha tak ka zir chhuak a, ka thil tih dik loh kha chu siamṭhat ka tum ang, inzirna zel a ni," tiin a sawi.

Season hmasa khan Djokovic hian Italian Open nomawi hi a chawi, quarterfinal an khelh laiin tun ṭuma umpire Forcadell bawk hi inkhel endiktu a ni a, khami ṭum khan Djokovic hi 'Federer' tiin a lo ko sual tawh! Swiss star Roger Federer hi a inlan ve miah lo thung.

World number 1 Djokovic hian tennis court chhungah chanchin danglam a nei fo tawh. Season hmasa khan US Open fourth round-ah line judge chu a hrawkah ball in a vuak per tawh a, inelna hmachhawn thei loa hrem a lo ni hial.

Theihna sang tak nei ni mah se a nungchang vangin lawm a hlawh tawk lo. Federer leh Rafael Nadal te huanga tel tur chuan tennis bakah 'nungchang ṭha' a zir belh a la ngai tih a lang.

Djokovic hian a match leh pekah chuan Alejandro Davidovich hnehtu Britain tlangval Cameron Norrie a hmachhawn leh ang. Inelna hi French Open inbuatsaihna a nih avangin an ngai pawimawh hle.