Euro khel lo tur Virgil van Dijk

Netherlands fan-ten thu hriat nuam lo tak an hria a, an defender chhuanvawr Virgil van Dijk chuan European Championship 2020-ah an ram tan a khelh theih loh tur thu a puang.

October 17, 2020 khan Liverpool defender hian a khupah hliam a tuar a, Everton goalkeeper Jordan Pickford nen Merseyside derby-a ball an inchuhna lamah a inhliam.

VVD khup hliam hi zai a ni hial a, a rawn kir leh hunah pawh ngai a awh leh kher ang em, tih chu zawhna chhan harsa tak a ni.

Dutch defender chuan, "Euro-a ka kal tur leh tur lohah hian zawhna harsa tak ka inpe a, uluk taka ka ngaihtuah hnuah ka taksa tan Euro khel tura fehchhuah loh mai hi a ṭha zawk niin ka hria a ni," tiin a sawi.

VVD chuan sawi zawmin, "Tuna ka rilru ka pekna tur chu club tana pre-season hman hun a ni a, chu chiah chu ka thlir rih. Euro ka khel lo tur hi hrehawm ka ti a, kan ram team tana hma ka hruai thei lo tur hi hrehawm ka ti takzet.

"Mahse, thil hi a thlen dan anga lawm taka pawm mai hi ka tih tur chu a ni a, pawm mai hi a finthlak a ni. Thil thlen dan ngaihtuah chungin Euro-a feh chhuak lo tura thutlukna siam hi a fuhin ka hria. Thutlukna siam harsa tak a ni a, mahse, rilru hahdam tak chungin ka siam a ni," a ti.

Kum 29 mi VVD hian hliam vangin tun season-ah Reds tan match riat chiah a khel hman a, a tel loa Liverpool talbuai zia chu an result-in a hril - Merseyside club hian tun season-ah nomawi an chawi dawn lo chiang tawh a, season thara Champions League khel lo thei dinhmunah an ding mek bawk.

VVD hian ram tan match 38 khelin goal li a khung tawh a, Liverpool tan nomawi chawi tur ang a chawi kim tawh laiin Dutch national team tan erawh UEFA Nations League final-a khelh tawh bak sawi tur a nei lo a, kum 2015 khan ram tan a inlan ṭan ve chauh avangin major tournament-a la khel lo - Euro 2016 leh World Cup 2018-ah Netherlands an tling lo.