Juve chhuahsan tur Buffon

Gianluigi Buffon chuan tun season tawp rualin Juventus a chhuahsan tur thu a ti chiang a, football khawvel erawh a la mangṭha dawn lo niin a lang - Italian club ṭhenkhat chuan an hnena khel turin an la duh nia sawi a ni.

Italian legend hi kum 43 mi a ni tawh, a vanglai a pel tawh a ni satliah loa a inkhelh pui tam tak chu team enkawltu manager an ni tawh. Turin club tan hian Serie A nomawi 10 bakah Italian Cup vawi li a la tawh a, a nep lo hle.

Buffon chuan, "Zin kawng bul ṭanna chuan a tawpna a nei vek. Tun hi Juve tan vawi hnih hun ka hman zawhna tur chu a ni. Thutlukna harsa tak siam tur hian puitling takin hun rei tak chhung inbiak hmasak a ni, a awlsam lo hle.

"Chhuak tura thutlukna siam a harsat chhan chu, he hmunah hian ka thawnthu, hlimna, lawmna leh lungngaihna chu a awm, ka in a ni. Mahse, tunah chuan tawpni chu chu a lo thleng tih ka hria, lawmthu sawiah chin tawk a awm thei lo ang," a ti.

Serie A khel hnem ber, match 656 zet khel tawhtu chuan sawi zawmin, "Juventus tan hian ka neih zawng zawng ka hlan a, chumi aia tam chu mi pe let thung. Hun ka hman zel dan tur pawh mawi taka ziah a ni ang, a tawp thlengin," tiin a sawi.

Buffon hian Italy tan match 176 a khel bawk a, inelna ngaihhlut ber 2006 World Cup-ah an ram hi a champion pui. European football inelna sang Champions League nomawi chawi lo mah se a sulhnu hi sawi nep theih a ni lo.