Zanin dar 12:15-ah DFB Pokal final RB Leipzig Vs Borussia Dortmund

13th May, 2021

Zanin dar dar 12:15 hian DFB Pokal final khelh a ni dawn a, Olympiastadion Berlin-ah RB Leipzig leh Borussia Dortmund te an inhmachhawn ang.

German Cup final khel tur hi coach naupang pahnih Julian Nagelsmann leh Edin Terzic te enkawl a nih avangin ngaihven a hlawh. Kum 33 mi Nagelsmann hian season tharah Bayern Munich a enkawl dawn a, Dortmund-in season thara manager turin Marco Rose an biak fel tawh avangin kum 39 mi Terzic tan hming chher nan nomawi pawh.

Final kalkawng
RB Leipzig hian final lut turin FC Nurnberg, FC Augsburg, VfL Bochum, VfL Wolfsburg leh Werder Bremen te an hneh a, semifinal-a Bremen an hneh ṭum chauhin harsatna an tawk. Leipzig leh Bremen hun pangngaiah 0-0 a inhnehtawk hnuin extra time-ah Nagelsmann hote 2-1 in an chak.

Borussia Dortmund hian semifinal-ah champion lai Bayern Munich hnehtu Holstein Kiel chu 5-0 ngawtin an sawp a, hemi hma hian MSV Duisburg, Eintracht Braunschweig, SC Paderborn leh Borussia Monchengladbach te an hneh.

An intluk tawk
Germany-ah Bayer Munich an ṭha fal a, Bavarians elpha ve ber pahnih chu RB Leipzig leh Borussia Dortmund te an ni. Leizpig hian league-ah point 64 an hmu a, pahnihnaah an awm mek. Dortmund hi hming langsar zawk ni mah se table-ah palinaah an awm mek a, point 58 hmuin Leipzig hi point rukin an pha lo.

Borussia Dortmund midfielder Julian Brandt chuan, "Rinkai zawk an awm lo. Final a nih bawk avangin eng pawh thleng thei a ni," tiin a sawi. Germany international player Brandt-a thusawi hi a pawm awm hle.

January thla khan Dortmund hian Leipzig hi 3-1 in an hneh a, May 8 khan Dortmund bawk hi 3-2 in an chak. Team pahnih intum hnuhnun ber hi kar liam ta chauh kha a ni a, Jadon Sancho-a'n minute 87-naah chakna goal a khung.

Hriat tel tur erawh Dortmund-in Champions League khelh an duh avangin an theihna zawng zawngin an khel a, Leipzig tan erawh final atan inkhek a ngai thung. Chutihrualin Dortmund-in Leipzig an hneh ṭum hian an goal khung khawl Erling Haaland inhliam vangin an chhawr thei lo a, tunah erawh training a zawm leh tawh a ni.