Hneh loh nei loin Sporting Lisbon an champion

Portuguese Primeira Liga-ah Sporting Lisbon tan hun ṭha a herchhuak ve leh ta. Sporting hian Thawhlehni zan khan Dias Fernandes goal khat hmangin Boavista 1-0 in an hneh a, a vawi 19 nan Portuguese champion an ni.

Ruben Amorim-a enkawl Sporting hian league match 32 an khelh chinah tlawm an nei lo, vawi 25 hnehna changin ṭum sarih chu an khingpuite nen an inhnehtawk - khelh hmabak match hnih la awmah pahnihna ni lai Porto tan umphak theih an ni tawh lo.

Liverpool leh Sunderland defender hlui Sebastian Coates hoa khel team hian nikum November thlatir aṭang khan table-ah hma an hruai a, tlahniam leh tawh loin a tawp thlengin an ding chang.

Sporting hian 2001-2002 season khan league nomawi an chawi a, a hnu lamah chuan Porto leh Benfica ten ro an rel a, team dang tan hmun a awm ve lo - tunah erawh club pahnih rorelna hi Sporting bawkin an rawn titawp leh ta.

Inkhel ṭan hmain stadium bulah Sporting fans tam tak an pungkhawm a, hun rei tak hnua champion leh thei an ni tih an hriat avangin an pungkhawm hi a mak hran lo. Boavista an hneh tih an hriat hnu phei chuan nomawi lawmin an sapatal chhunzawm.

Hrileng pawh ngaihtuah chang loin kawtthlerah champion an lawm a, mipui pungkawm hi police-ten hnawhdarh tumin an in nawr buai chhunzawm a, hliam tuar pawh an awm hial.