AFC-in AIFF dilna an hnawl

All India Football Federation (AIFF)-in Asian Football Confederation (AFC) hnena an hmabak match awmte sawnsak tura an ngenna chu AFC chuan an hnawlsak a, Asia khawmualpuia football thuneitu sang ber chuan Indian FA ngenna chu tihhlawhtlin a harsat thu an sawi.

India hian World Cup qualifier-ah Qatar (June 3), Bangladesh (June 7) leh Afghanistan (June 15) te an hmachhawn a la ngai a, Covid-19 hri leng karah AIFF chuan inbuatsaih theihah ngai loin inkhelh hun hi sawn an dil.

Mahse, AFC chuan AIFF dilna hi pawmsak chiah an ngai lo a, ruahmanna awm sa angin India chu inkhel mai turin an ti ta a ni. India tana buaithlak tur chu camp buatsaih aṭangin a inṭan a, March-ah khan Indian Super League khelh zawh a nih tawh avangin player in fit an tam lo ang tih a chiang bawk.

India coach Igor Stimac chuan Thawhlehni zan khan player-te be kualin lo inring turin a hrilh tawh hlawm nia sawi a ni a, player fit a duh chuan AFC Champions League khel zo hlim FC Goa leh AFC Cup khel tura inbuatsaih Bengaluru FC players lam a hawi a ṭul ang.

AIFF hotu, a hming tarlan loh chuan, „Training-na hun kan neih tam zawk theih nan May 7 khan Doha pan kan duh tawh a, mahse, Qatar FA lam aṭangin kan kal theih hun tur hrilh kan la ni lo,“ a ti.

India hian an beisei anga Qatar an thleng vat thei dawn lo a nih chuan Dubai-ah training nei tura an zinchhuah a rinawm - Qatar-ah hian ni 10 tal quarantine (inkhunghran) a ngai dawn a, a zin zawng zawngte chuan RT-PCR test negative report (darkar 48 chhunga lak) an neih ngei ngei a ngai bawk. Tuna a lan danah chuan Indian player-te hian ni thum vel bak training-na hun an nei dawn lo tihna a ni.

World Cup qualifier hi home & away-a khelh ni mah se Covid-19 vangin group E lama khelh hmabak la awm chu Qatar hian a thleng vek dawn a, match nga an khelh tawh aṭanga point thum chiah nei thei India hi World Cup 2022 khel turin an tling thei tawh lo.

Hetihrual hian group-a a ti ṭha pathumna erawh an la ni thei a, he dinhmun hi an luah theih chuan Asian Cup 2023 qualifier third round an lut nghal ang - India tan khelh chhan a la awm tihna a ni.

India coach Stimac chu probable squad puang thuai tura beisei a ni a, he thuziak i chhiar meuh chuan a puang fel tawh hial mai thei.