Goal nga khung thei Napoli

Season thara Champions League khelh tum Napoli chuan Udinese 5-1 in an sawp a, Italian football inelna sang ber Serie A table-ah pahnihna dinhmun an luah - khelh hmabak pahnih chauh an nei tawh.

Gennaro Gattuso naute hian match 36 aṭangin point 73 an hmu a, anmahni aia match khata khel tlem Atalanta, AC Milan leh Juventus te chungah an awm, club lian pathum hian point 72 ṭheuh an neih avangin an dinhmun an la inthlak kual vek thei.

Diego Armando Maradona Stadium-a inkhelah Napoli tan Piotr Zielinski, Fabian Ruiz Pena, Hirving Lozano, Giovanni Di Lorenzo leh Lorenzo Insigne-ten goal khat ṭheuh an khung.

Napoli hian an hmabakah Fiorentina leh Verona-te an la hmachhawn leh dawn a, season thara UCL khel ngei turin hun ṭha an nei, chutih rualin an elpui dangte an chet ṭhat ve tho chuan khel lo thei an la ni bawk.

Napoli coach Gattuso chuan, "Kan zinkawng a la tawp lo, lawm avanga lo phili hun a la ni lo," tiin season a la zawh loh thu a sawi.