Goal khung bansan thei lo Ronaldo

Cristiano Ronaldo-a’n Serie A match a khelh hnuhnung pakuaah goal a khung vek a, a club Juventus chu Fiorentina lakah 3-0 in hma a hruaipui. Inter Milan chuan Udinese hnehin Turin club hi na takin an um chhunzawm zel bawk.

Pathianni zan Allianz Stadium-a inkhelah Juventus tan Ronaldo chuan minute 40 leh 80-naah penalty aṭangin goal hnih a khung a, hun tawp hma deuh chiahin defender Matthijs de Ligt chuan an goal thumna a khung bawk a ni.

Portugal captain hian league match vawi kua ngawt mai a zawnin goal a khung tawh, David Trezeguet-a’n 2005 December thlaa record a lo siam tawh chu nih rualin - season kal laiah ram leh club tan match 33 aṭangin goal 33 a khung.

Turin club hian league match 22 an khelh tawhah point 54 hmuin table chung berah an awm chhunzawm a, season riat chhung Serie A nomawi an chawi zawn tawh chu humhim turin kawng dik an zawh.

Antonio Conte enkawl Inter Milan chuan Juventus chu champion tir mai an tum bik lo, striker Romelu Lukaku goal hnih hmanga Udinese 2-0 a luhchhuahin pahnihna an nih chhunzawm - Juve nen an inthlauhna chu point thum chauh a ni.

Nerazzurri tan hian Premier League lama hmelhriat hlawh Christian Eriksen leh Victor Moses ten an league match hmasa ber an khel a, Ashley Young-a’n bul a ṭan ve bawk. Chelsea manager hlui Conte hian a hman thiamsa Moses bakah Young chu wing back atan ṭangkai takin a chhawr.

Ronaldo ang bawkin Lukaku hming leh goal chu sawizawm a ngai zel. Belgium international hian Inter a pan hnuah league goal 16 a khung der tawh a, inelna hrang hrangah Italian club tan hian goal 20 a nei tling leh tawh bawk.

Cesare Maldini-a fapa chu Paolo Maldini a ni a, Paolo Maldini-a fapa chu Daniel Maldini a ni thung. Cesare-a tupa Daniel chuan Pathianni zan khan AC Milan tana Serie A match hmasa ber a khel a, an mikhual Hellas Verona nen 1-1 in an inhnehtawk.

Kum 18 mi Daniel hi a pa leh a pu te defender ni mah se attacking midfielder a ni thung, thlahtu aṭanga football thiam an nih bakah theihna a neih san avangin Milan chuan a lakah beisei an nei sang.

Milan tana league nomawi pasarih bakah Champions League title pawh panga ngawt chawi tawhtu Paolo Maldini fapa pakhat zawk Christian pawh Milan youth team tan a khel mek a, an chhungkua leh Milan hi an inzawm nghet hle.