Chelsea ngamtu Emile Smith Rowe

Champions League final khel tur, FA Cup final khelh hmabak, Thomas Tuchel kaihhruaina hnuaia indin thar Chelsea chu Arsenal lakah 1-0 in an chak lo, goal awmchhum hi Emile Smith Rowe-a khung a ni.

Nilaini zan Premier League inkhel hi Gunners tan awmze nei tak a ni tawh hran lo, an chak avangin an mualpho lutuk tur boruak an vaw dai. Blues erawh an chak loh avangin season tharah Champions League an khel ngei dawn em, tih a chiang ta lo.

Hnehna an chan hnuah Mikel Arteta chuan, "Team ropui leh ṭha tak kan hmachhawn a, a ṭha thei ang bera kan khelhchhuah avangin result duhawm kan nei. A tir aṭanga a tawp thleng khan lawmna tur hlir a ni," tiin a sawi.

Kante tel lo
Tuchel-a'n Inrinni zanah Leicester City nena FA Cup final an khelh tur a ngaihtuah tel a ngai a, league lama an dinhmun a la him loh avangin player thlak chiam ngawt pawh a rem chuang lo - a neih ṭhat zingah N'Golo Kante awltirin, a hmun ruakah rawlthar Billy Gilmour a ding.

Tlarhma player zingah Timo Werner chu hahchawlhna hun pek a ni a, ani hi awm lo mah se Mason Mount, Christian Pulisic leh Kai Havertz te an intlar ṭhap thei a, anni aia ṭha hi luhtir tur dang an nei chuang lo.

Arsenal lamin an midfielder pawimawh Granit Xhaka chu hliam vangin an la chhawr thei lo. Captain Pierre-Emerick Aubameyang thlawp turin rawlthar Smith Rowe leh Martin Odegaard an awm a, Bukayo Saka chu tlarhnung lam pui tura pawh hnun a ni thung.

Back pass sual
Stamford Bridge-a inkhelah Arsenal defender Gabriel leh Pablo Mari te ball inpek sual chu Havertz-a'n a laksak a, chak zeta thui tak ball a tlanpui hnuah keeper Bernd Leno chauh a hmachhawn tawh a, mahse, Germany international hian a pet 'over' hlauh.

Minute 16-na a ni a, Chelsea tlarhnung lama ball inpe kual chu Arsenal player pathumin an hual tawt. Smith Rowe-a'n Jorginho-a ball chang a hnaihchilh a, ani hian keeper awmna ngaihtuah hmasa loin a back pass, keeper Kepa Arrizabalaga-a'n harsa takin goal line aṭangin a hui chhuak hram.

Kepa-a ball hui chhuah hi a sira awm Aubameyang chuan lo dawng fuhin Smith Rowe tan a siamsak a, English rawlthar hian 'cool' zetin a khung. Smith Rowe hian nikum khan Blues lakah 'sawi hat' thamin a lo khel tawh bawk, kum 20 mi chauh a la ni.

Vanduaina
Chelsea lamin ball an chang hnem a, goal khung theihna remchang pawh an insiam nual. Corner aṭanga ball lo kal an tauh per chu Christian Pulisic-a'n a su lut a, mahse VAR hmanga ennawn a nih hnuah American midfielder hi chiang takin a offside tih a lang.

Defender Kurt Zouma-a ball tauh chu Leno-a'n a lo tawk per zauh a, bar a per - keeper hian khawih fuh lo se a lut chiah ang. Ball per hi boruaka a awm laiin substitute Olivier Giroud chuan a lo volley, mahse ani pawh a vannei bik lo; bar bawk a per.

Nikum Krismas ruaiṭheh zan khan Emirates Stadium-ah Blues hi 3-1 in an tlawm tawh bawk a, tun hnai kum 17 chhunga a vawi khat nan season khat chhungin league-ah Arsenal vawi hnih an ngam lo, London club laka an record ṭha tak chu a tawp.

Chak lo zel ta se...
Thomas Tuchel-a'n harhtharna a ken tel miau avangin Chelsea fans lamin Frank Lampard an ngai lo, an thlen chinah an lawm. Mahse maw, season a tawp hma chuan German manager hi hahipa fak ngawt theih a la ni bik lo.

FA Cup final-ah chak lo ta se, EPL-ah palina ni pha lo ta se, UCL final-ah Manchetser City an ngam loh bawk chuan chhuan tur an nei dawn miah lo. Tuchel leh Blues tan chuan May thla an hman hmabak hi final ang veka pawimawh a ni.

Tuchel chuan, "Hun ṭha tam tak kan nei chunga goal kan khung thei lo khan min tithinrim. Inkhel a tawp meuh kha chuan player khel tur ka thlan danah ka tisual tih ka hria, mahse khatiang kha a thleng dawn tih ka hre lawk bik lo, 100% rilru pe ila chuan kan chak ang," tiin a naute a dem. Chelsea hian league-ah Leicester City leh Aston Villa an la hmachhawn leh dawn a, an elpui club pahnih hnehin FA Cup chawi chhunzawm se, season khar nan UCL an chawi bawk a nih ngat chuan khawvela manager ṭha leh club ropui an ni daih thung ang.