Hnehna nen Nadal a lo kir

Rafael Nadal chuan Madrid Open lamah beisei phak lo mah se Italian Open a khel zui a, Thawhlehni zan khan a khingpui Jannik Sinner lakah 7-5, 6-4 a hnehna changin last 16 a in hlangkai.

Clay court-ah chuan Italian rawlthar Sinner hi player ṭha ve tawk tak a ni tawh, set hmasa zawkah pawh Nadal service chhuhsakin set point hial a hmu hman a, mahse tawnhriat ngah zawk Nadal-a'n harsa takin a la hram.

Rome khawpuia inkhel an nih avangin Sinner a zam lo, amaherawhchu Spanish tlangval zawk pawh hian vawi kua ngawt a lo champion tawhna hmunah tumah a huphurh bik lo tih a lang, a tawpah chuan a ruh 'no' zawk a lang.

Seeded pakhatna Nadal hian a match lehpekah chuan seeded 13-na Denis Shapovalov a hmachhawn leh ang, ani hian inkhel dangah tualchhung tlangval Stefano Travaglia chu 7-6, 6-3 in a lo hneh ve bawk a ni.

Grand Slam vawi 20 champion tawh Nadal chuan, "Madrid lama ka result ngaihtuah chuan ka khel ṭha thawkhatin ka hria. Tihsual chu la nei mah ila a pumpui thlir chuan ka khel ṭha viau niah ka ngai," tiin a sawi.

Clay court hmang thiam lo Daniil Medvedev erawh a che fuh thei lo. Seeded pathumna hi Aslan Karatsev lakah 6-2, 6-4 in a chak lo, Russian star hi hneh nei loin a tla - Madrid Open lamah pawh khan player pakhat chauh hneh chungin a lo tla tawh bawk.