Portugal-ah UCL final

Tun season Champions League final chu Instanbul-a khelh turin ruahmanna siam vek ni tawh mah se Covid-19 vangin season liam taa final khelhna Portugal-ah sawn a ni.

Nikumah Bayern Munich-in 1-0 a Paris Saint-Germain hnehin an champion a, Benfica khelmual Estádio da Luz-ah final hi khelh a ni. Kuminah erawh FC Porto khelmual Estadio do Dragao-ah nomawi inchuhna hi neih a ni ang.

May 29, Inrinni zan dar 12:30-ah Manchester City leh Chelsea ten final an khel dawn. English club pahnih an inhmachhawn dawn avangin English mipui ngaih pawimawh an ni a, England-in Covid-19 hri hluarna Turkey-ah zin a phal loh avangin inkhelhna hmun hi an sawn ta ni.

UEFA president Aleksander Ceferin chuan, "Club ṭantuten final an en theihna bawhpelh tir hi kan duh dan a ni lo a, hun ṭha a inher chhuak thei hi kan lawm hle. Thla 12 chhung fan-ten an tuar tawh a, anni tan chuan Champions League final-a an team inkhel thlir hi an hun tawn ropui ber a ni thei a ni," tiin fan-te dinhmun a hriattthiampui hle.

Final-ah hian Manchester City leh Chelsea ten entu 6,000 ve ve an nei thei dawn a, chutihrualin final-a mipui awm thei zat tur hrim hrim erawh tih chian a la ni lo.