Zaninah champion thar inlan dawn Newcastle United Vs Manchester City

Manchester City-in an match hnuhnung berah Chelsea 2-1 a an hneh loh avangin Premier League champion hun sawn tlai a ni a, amaherawhchu Thawhlehni zanah Leicester City-in Manchester United 2-1 an hneh tak avangin Pep Guardiola hote an champion ta tho.

Zanin dar 12:30 hian champion thar Manchester City an inlan dawn a, Citizens hian St James' Park-ah Newcastle United an hmachhawn ang. Tun season Premier League leh League Cup-ah Man City an champion tawh a, hmabak chu Champions League a ni.

Citizens hian May 29, Inrinni zanah Chelsea nen Champions League final an khel dawn a, Premier League-a an inkhelh hmabak pathum hi final atana inbuatsaihna vek a ni thei ang.

Newcastle hi...
Premier League champion tur a chian tawh ang bawkin relegate tur a chiang tawh a, table hnuai lam pathum Fulham, West Brom leh Sheffield United te an relegate.

Man City khelhpui tur Newcastle hian point 39 chauh la hmu mah se season tharah Premier League-ah a la inlan dawn avangin khelh chhan tur ṭha bik an nei tawh lo. Chutihrualin Steve Bruce-a hote hian an match hnuhnung berah Leicester City 4-2 in an sawp.

Hei chauh hi a ni lo, match hnuhnung panga aṭangin Newcastle hian point 10 an hmu, relegate thei dinhmuna ding tan chuan an result hi ṭha tak a ni. Steve Bruce-a hote hian season liam ta champion Liverpool an chelh bakah Champions League khelh tum West Ham leh Leicester City te an hneh a ni.

First XI inchuh
Manchester City-in Champions League final hmain Newcastle United, Brighton & Hove Albion leh Everton te an la hmachhawn dawn a, Pep Guardiola-a'n final khel tur zawnna atan a hmang ang.

Spanish manager Pep-a thlirnaah chuan Paris Saint-Germain an hneh ṭuma bul ṭantu player-te an buk a rit ber a rinawm a, chutihrualin player dang tan tun match thuma an khelh dan a zirin beisei tur a la awm thei ang.

Champions League final hi a satliah lo, 2006 final-a Arsenal leh Barcelona inkhelh ṭum khan minute 18-naah Gunners keeper Jens Lehmann-a'n red card a hmu. Arsene Wenger-a'n loh theih loin player pakhat a thlak a ngai a, mahni rama final khelh ṭumah French midfielder Robert Pires a thlak.

Pires hi Arsene-a chungah a thinur a, a hun tawn hrehawm ber a nih thu a sawi hial. French midfielder hian nipui bazarah London club chhuahsanin Villarreal a pan nghal bawk.

UCL final khelh hi club tan chanchin ṭha ni mah se team chhungah boruak ṭha lo a awm phah thei ve bawk. Man City-in player ṭha an ngah avangin final khelh zawhah player zawng zawng an hlim vek a rinawm lo a, hetiang hi a thleng thei tih hre lawktu Pep Guardiola pawhin semifinal-a an chak zawhah player khelh ve lote hming a lam ri hmasa ber.

Engtin zel?
Chelsea an hneh loh ṭumin Man City forward Sergio Aguero-a'n penalty a hlah a, Pep Guardiola a thinur hle. Spanish manager hian season tawpa chhuak mai tur Aguero hi a hrem hreh a rinawm lo a, chutihrualin, "Champions League nomawi ka chawipui hma chu Man City ka chhuahsan lo ang," ti tawhtu Aguero hi UCL final-a kan hmu dawn a nih chuan a hun ṭha neih leh hmasak ber a hman ṭangkai a ṭul ang.

City thiampuipa Kevin De Bruyne chu inhliam vangin Chelsea lakah a inlan lo a, Newcastle lakah pawh dam chiang lo chuan a inlan lo ang. Chelsea an hmachhawn ṭuma bench aṭanga lut Phil Foden, Ilkay Gundogan leh Bernardo Silva ten bul an ṭan leh tawh a rinawm.

Tlarhnungah Ruben Dias chu rinrawl a ni a, Portuguese defender kawppui turah John Stones buk rit ber mah se English defender hi a chesual a nih chuan UCL final-ah bench-a la ṭhu thei a ni.