Joshua vs Fury: Saudi Arabia-ah nei dawn

Boxing ngainatute nghahhlelh Anthony Joshua vs Tyson Fury chu Saudi Arabia-ah neih a nih tur thu promoter lar Eddie Hearn chuan a sawi a, an inhnekna tur stadium leh hun erawh tihchian a la ni lo thung.

Hearn chuan, "Zep tur a awm lo a, fighter pahnih hi Saudi Arabia-ah an intawng ngei dawn a ni. Andy Ruiz leh Joshua rematch huaihawttute nen tho khan kan thawkho leh dawn a ni.

"Thawhpui an nuam a, Anthony pawhin nuam a ti a ni. Joshua-te inhnek an thlen ṭum khan an thil intiam zawng zawng an tihlawhtling vek a, he inhnek huaihawt leh tur hian kan inpeih a ni," a ti.

Joshua hian June 2019 khan rin loh takin Andy Ruiz Jr. chu a ngam lo a, December 2019 khan Saudi khawpui Riyadh daifema Diriyah-ah an inhnek leh a, Joshua hian WBA (Super), IBF, WBO leh IBO heavyweight title a hloh tawh chu a nei let leh a ni.

Hearn hian March khan Joshua vs Fury inhnek turin inremna a awm thu a lo sawi tawh a, vawi hnih fight nei tura boxer pahnihin contract an ziah thu thlengin a tarlang.

Mahse, April thla tawp lam khan Fury co-promoter Bob Arum chuan inbiaknaah hmasawnna a awm loh thu a sawi ve thung a, hei hi Hearn chuan phain, "A thleng ngei dawn," tiin a hnuah a sawi thung.

Boxer pahnih hi ruahman anga an inhnek thei a nih chuan August-ah an intawn a rinawm a, Hearn chuan August 7 emaw 14-ah a thlen tur thu a sawi.

Kuminah Olympic neih a ni dawn a, ruahman ang chuan Tokyo khawpuiin a thlen tur infiamna khawmpui hi August 8-ah zawh tum a ni. Hei vang hian Hearn chuan August 14-a inhnek chu thil awm tak a nih zawk thu a sawi a, "A chiang thuai ang," a ti.

Saudi Arabia-in inhnek a thlen theih tur chhan hi sum lama an ngam huai vang a ni a, khawthlang media-ten an tarlan dan chuan pay-per-view aṭanga sum hmuh tur chhiar tel lohin pound maktaduai 106 an chhawp ngam.

PPV chhiar tel phei chuan sum lut tur hi a tam dawn tih a chiang a, Joshua leh Fury hi a inhnek a nih chuan a tlem berah pound maktaduai 100 ve ve an insem thei ang.

Joshua hian WBA, WBO leh IBF-a kawl laiin Fury hian WBC title a kawl thung a, boxer pahnih hi an inhnek thei a nih ngat chuan heavyweight boxing-a kawnghren lian tham pali, vawi khata inchuh hmasak ber a ni ang.

Heavyweight boxing-a undis-puted champion hnuhnung ber chu Lennox Lewis a ni a, mahse, British boxer-in 1999 - 2000 inkara he dinhmun a luah lai khan WBO belt chu kawnghren liantham zinga chhiar tel a ni lo a, kawnghren pathum chiah a kawl.