Match 1000-naah Serena a chak lo

Serena Williams chuan tennis match 1000 a khel tling ta a, mahse American star hi mellung pawimawh bik a phun niah hian Argentine nula Nadia Podoroska lakah a chak lo.

Nilaini zan Italian Open first round inkhelah Serena hi 7-6 (8-6), 7-5 in a chak lo. Kum 39 mi Serena hian February thla laihawl hnua tournament a khelh lehna hmasa ber a ni a, a tan thil a awlsam lo tih a lang.

Grand Slam vawi 23 champion tawh Serena chuan, "French Open khelh hmain match khelh tam ka mamawh tih ka hria, mahse hri leng vangin ruahmanna siam thiam a harsa. Coach leh team-te nen kan sawi khawm ang a, chumi hnuah a ṭha ber a lo chhuak turah ka ngai," a ti.

Tunkar tawp aṭang hian Italy ram chhungah tho hian Emilia-Romagna Open khelh a ni dawn. Parma khawpuia inelna buatsaihtute hian duhsak takin Serena hi wildcard an pe a, world number 1 hlui hian a pawm tawh.

Rome khawpuia inelna neih laiah player langsar dangte pawh an che fuh lo. Grand Slam vawi li champion tawh Naomi Osaka chu Jessica Pegula lakah 7-6 (7-2), 6-2 in a chak lo - Japan nula hian clay court chhunga tournament a khelh hnuhnung pahnihah second round a pel lo.

Inkhel dangah champion lai Simona Halep a inkhel tluan thei lo. World number 3 hian Angelique Kerber lakah 6-1, 3-3 in hma a hruai mek a, mahse a chawn vei lam hliam vangin a khel chhunzawm thei ta lo a ni.

Romanian star hliam hi eng ang taka na nge a nih hriat a la ni lo, tun thla tawpa khelh tur French Open erawh a khelh theih ngei a beisei thu a sawi a, endik a nih hnuah a dinhmun tak a hriat chauh ang.