Mbappe-a'n PSG final a thlenpui

Paris Saint-Germain-in French Cup final thleng turin Nilaini zan khan Montpellier an hneh a, final hi May 19, Nilaini zanah khelh a ni ang. Nizan khan semifinal hnuhnung zawkah Monaco leh Rumilly Vallieres te an inkhel a, result kan hre hman lo.

Coupe de France-ah champion lai PSG-in awlsam takin final an lut lo. Mauricio Pochettino-a'n bul ṭantu zingah Kylian Mbappe a telh thei a, France international player hian minute 10-na lekah goal hmahruai a khung.

Montpellier-in minute 45-naah an sut a, PSG-in second half minute 50-naah Mbappe hmang bawkin hma an hruai nawn. Amaherawhchu Montpellier-in Andy Delort hmangin minute 83-naah an sut leh a, PSG-in Neymar luhtir hnuhnawh mah se goal a keng tel lo.

Extra time awm loin penalty pet nghal a ni a, PSG tana petu Angel di Maria, Julian Draxler, Leandro Paredes, Marquihos, Neymar leh Moise Kean ten an khung vek laiin sudden death-a Montpellier tana pettu Junior Sambia-a'n a hlah.

Penalty shootout-ah PSG 6-5 in an vannei a, final an lut. Ligue 1-ah erawh PSG hi nomawi chan thei dinhmunah ding. Poch-a hote hian match hnih khelh hmabakah Reims leh Brest an la hmachhawn dawn a, hmahruaitu Lille point thumin an pha lo.