Atletico tan champion a hnai ta

Barcelona chak zawh loh hnu lawkah Atletico Madrid an chak a, an mikhual Real Sociedad chu 2-1 in an hneh - Diego Simeone-a naute tan champion a hnai ta hle.

Atletico tan Yannick Carrasco leh Angel Correa -ten goal khat ve ve an khung a, Sociedad tan Igor Zubeldia chuan goal khat khung ve mah se awmzia a nei thui lo.

Atletico-in league match hnih chiah khelh tur an nei tawh a, an hmabak match hnihah hian an chak chuan an champion ang - Sociedad lakah hian Atletico tan captain Koke chuan a match 500-na a khel a, hetih chhung hian goal 46-a khung bakah assist vawi 105-a nei thei.

Nizan khan Atletico elpui ber Real Madrid an inlan a, he thu buatsaih a nih lai hian result kan hre hman lo - Real hi an tlawm chuan Atletico tan champion turin vawi khat chak chiah a ngai tawh dawn.

Atletico vanneihna
January thla tawp thleng kha chuan Atletico-in fal takin hma an hruai a, La Liga-ah champion chiang tur ang hiala ngaih an ni. Mahse, February an chuang kai a, Atletico an talbuai tlat.

Tun season La Liga match 36 an khelh tawhah vawi li an tlawm a, vawi thum an tlawm hi February hnua thleng a ni - vawi riat draw an nei a, heng zinga vawi ruk chu February hnua thleng bawk a ni! Kar hmasa khan Atletico-in an result duhawm lo thaibo a, an elpuite tlanchhiatsanna remchang an nei leh a, mahse, an hmelma Barcelona chu khualmualah 0-0 in an inhnehtawkpui.

Mahse, result ṭha lo karah Atletico an vannei leh tlat ṭhin - Barca nena an inhnehtawk hi an elpui Real-in remchangah an la thei lo a, Sevilla chu 2-2 in an inhnehtawkpui a, Atletico bawkin hma an hruai chhunzawm.

Champion duh Atletico
Real-in hma an hruai theihna hun an bawhpelh a, Atletico an draw hnua an match hmasa berah Barcelona-in point khat chiah an hlawh chhuak zui - Atletico erawh an tawlhthlu ve duh tawh lo.

Inkhel ṭan aṭanga minute 16-na lekah Yannick Carrasco a inlar a, Marcos Llorente hnen aṭanga a ball hmuh chu Sociedad keeper Alex Remiro kap karah a pet lut a, 1-0 a ni. Minute 12-a liam a, Atletico bawk kan hmu nawn. League match li zet goal khung tawh lo Luis Suarez-a'n ṭhiante khung tur siamsak hna a thawk a, Correa tan ṭha takin ball a pe.

Argentine winger Correa hian a ball hmuh hi vawi khatah a pet nghal a, mawi zetin goal kil sirah a lut - chawlhlawk an hman meuh chuan Atletico an chak dawn tih a chiang tawh.

Simeone-a lawmna
Sociedad tan Igor Zubeldia chuan minute 83-naah corner aṭanga ball kal chu si phurh sut ṭhen nan a hmang a, mahse, an goal khung a tlai hret avangin an tho hman tawh lo - first half-a Alexander Isak-a hun ṭha neih Jan Oblak-a'n a dansakte chu an ui thar ang.

Inkhel tawpna hamrik a ri a, Wanda Metropolitano Stadium-ah manager Simeone-a'n lawm taka zuang chungin boruak a hnek a, Argentine coach hian an tan champion a hnai ta tih a hria - mahse a fimkhur loh phah lo.

Kum 51 mi coach chuan, "Kan khel ṭha viau a, mahse, hun tawp dawna an goal khan minti buai deuh chu a ni. Tunah chuan chawlh hahdam phawt kan mamawh - season harsa tak a ni a, a tawp thlengin a harsa ang tih ka hria," a ti.

Simeone chuan sawi zawmin, "Ṭum dang ang lo takin rang taka season hman a ngai a, keimahni chauh ni loin team dang pawhin hei hi chu an tuar vek. Thil thui tak kan thlir lo, kan hmabak game zel kan en ang," a ti a, a fimkhur hle.

Tute nge champion thei?
Nilaini zan inkhel dangah Sevilla chuan 1-0 in Valencia an hneh a, Youssef En-Nesyri chuan inkhela goal awmchhun hi a khung - anni erawh an champion thei tawh lo.

Barcelona-in point liin Atletico an thlau ta a, Catalan club tan champion tur chuan Real leh Atletico chetsual chan tel a ngai a, a thlen a rinawm loh zawk. He thuziak i chhiar meuh chuan Real Madrid result a hriat tawh ang a, an chak a nih chuan champion an la beisei thei zel ang.

Real hi Atletico aiin head-to-head ah an ṭha zawk a, point hmuh zat inangin team pahnih hian season khar ta se, Real Madrid hi an champion dawn tihna a ni - Atletico tan an hmabak match hnihah chak ngei ngei a ngai tihna a ni.