Gianluigi Buffon-a'n penalty a dang UCL inchuh boruak a sang chhunzawm
Juventus a chhuahsan dawn tih a sawi hnua a match hmasa berah Gianluigi Buffon a che pui, Italian legend hian Sassuolo forward Domenico Berardi-a penalty chhuih dangin Old Lady chu 3-1 in hnehna a chanpui.
Champion lai Inter Milan chuan season thara Jose Mourinho enkawl tur AS Roma chu 3-1 bawkin an hneh a, season thara Champions League khelh tum - AC Milan, Atalanta leh Lazio te pawhin an khingpui ṭheuh an hneh, khelh hmabak pahnih a la awm.
Buffon a ding nghet
Juventus tan Adrien Rabiot-a'n goal hmahruai a khung hnuah Cristiano Ronaldo chuan Italian club tana a goal 100-na a khung, Giacomo Raspadori-a'n siphurh sut ṭhen mah se Paulo Dybala goal hmangin Juve-in chak an nemnghet.
Goal thum an khung a, goal khungtute aiin keeper Buffon chu media lan chaw tui a tling. Leonardo Bonucci-a'n Raspadori a tih tluk vangin penalty a chawi a, a pet turin Berardi a rawn ding chhuak - kum 43 leh ni 104 zeta upa hian a lo dansak.
Serie A huangah Buffon hi penalty 'save' thei upa ber a ni nghal a, Italian football inelna sang berah match 657 a khelh tlinna a ni - a kum a tam deuh tawh avangin season kal laiah erawh chhawr rim a ni lo, league match sarih chauh a la khel.
Buffon hian penalty a dang chauh a ni lo, Pedro Obiang leh Manuel Locatelli ten mawi taka ball an inpek kual hnuah hun ṭha bik an sual chhuak a, mahse Obiang khung tur hi Buffon-a'n a lo dansak a ni.
Hmabak chu Inter
Andrea Pirlo kaihhruai Juventus hian Inter Milan lakah Serie A nomawi an hloh fel tawh a, Inrinni zan hian Allianz Stadium-ah Inter hi an lo mikhual dawn, team pahnih hian an ti mai mai lo ang tih a rin theih.
Nerazzurri hian an champion hnuah pawh match hnih khel leh tawhin hnehna an chang ve ve, goal riat khungin anmahni lamah goal hnih chiah a lut - Juve tan hmachhawn chakawm tak an ni dawn lo, Conte naute hian tlawm an duh lo.
Juve hian match 36 aṭanga point 72 hmuin table-ah pangana an ni mek, Inter bakah hian Bologna te an la hmachhawn dawn. Old Lady tan season thara UCL khel tur chuan chak ringawt a tawk dawn lo, an elpui Atalanta, AC Milan leh Napoli ten point an hloh tel a ngai dawn.
Pirlo naute hian Inter leh Bologna an hmachhawn inkarah Atalanta nen Coppa Italia final khelh tur an nei bawk a, an hmabak a hautak dawn. European football inelna sang ber an khel phak lo a nih chuan Ronaldo hma hun thlengin nghawng a nei ang.
Inkhel dang
Thawhlehni zanah Napoli an chak chiang tih hresain Nilaini zanah Atalanta an inlan a, tun season Serie A goal khung hnem ber (86 goals) club hian Luis Fernando Muriel Fruto leh Mario Pasalic te goal khat ve ve hming Benevento chu 2-0 in an hneh.
Milan pawhin goal an surtir. Ante Rebic-a hattrick hmangin Milan hian Torino chu 7-0 in an sawp a, Theo Hernandez-a'n goal hnih a khung bakah Franck Kessie chuan penalty khungin Brahim Diaz-a'n goal khat a thawh ve bawk. Stefano Pioli enkawl Milan hian Cagliari leh Atalanta an la hmachhawn leh dawn a, an elpui Atalanta nen an la inkhel tur hi Juventus tan chanchin lawmawm a ni thei ang. Chutih rualin Atalanta leh Old Lady inkarah point thum a awm, an goal difference a ṭha zawk bawk a ni.
Milan manager Pioli chuan, "Rinkai ni mah ila Serie A nomawi kan chawi lo, kan champion loh chhan kha hun pawimawh laia kan chetsual vang a ni. Tunah a pawimawh vawrtawp kan thleng leh mek, dingchang turin theihna kan nei tih lantir a ngai," a ti.
