Andy Murray an duhsak dawn

French Open tourna-ment director Guy Forget chuan Andy Murray chu duhsak tlak nia an ngaih thu a sawi a, clay court inelna lianah hian qualifying khelh hah ngai loa a inlan theih nan wildcard an pe ang.

Kum 33 mi Murray hi hliamin a tibuai ngun hle a, tunah chuan world number 121 a ni - a ranking aṭanga chhut chuan Roland Garros-ah main draw khel turin a tling phak lo, qualfying khelh a ngai dawn tihna a ni.

Mahse, tun hmain Murray hian French Open final a khel tawh a, tennis inelna dangah sulhnu ṭha a hnutchhiah fo tawh. Tunlai hian Rome khawpuiah Italian Open chu doubles huangah a khel mek.

Double huanga inlan ni mah se singles khel tur pawhin training a nei reng a, tun hnaiah world number 1 Novak Djokovic nen an training lai chu French Open buatsaihtu lam hian an lo hmu fuh a ni.

Forget chuan, "Andy hian French Open khelh a tum ngei ka ring, tun hnaiah a training lai ka hmu. Djokovic nen an inkhel a, game mai bakah set pangngai pawh an khel. Tun hnaiah a inkhel tam tawk lo a ni mai thei, mahse player ropui a nih avangin wildcard dawn a phu.

"Player tam tak chuan inkhelh tam loh hi hrehawm an ti ṭhin, a bik takin best of five match khelh phei chu hautak an ti thei hle. Andy erawh a rilru a paukhauh a, a taksa in a tlin phawt chuan inkhelh zel duh chi a ni," a ti.