Manchester an UNITED leh ta

Manchester Derby-ah Manchester United-in Premier League champion lai Manchester City 2-0 in an hneh. Ole Gunnar Solskjaer hoten tun season Premier League-ah Man City ṭum hnih an hneh a, 2009/10 season hnua an 

ṭhenawm club season khata vawi hnih an hneh lehna hmasa ber a ni.

Old Trafford-a inkhel hmuhnawm tak hi Man City keeper Ederson tan mangchhia a nih rualin Anthony Martial leh Scott McTominay goal mawina a hliahkhuh pha lo. Pep Guardiola hote an khel ṭha a, Solskjaer hote an la khel ṭha zawk - Pathianni zan inkhel aṭangin United ṭantuten lawmna an hmu ngei ang.

Mancheser City tan point thum nghawng a lian tawk lo a, Liverpool lakah nomawi an chan dawn tih chu 'zawlnei' lo tan pawh hmuh lawk theih a ni tawh. United tan erawh season thara Champions League khelh duh chuan chak ngei a ṭul a, an chung chiaha awm Chelsea-in Everton 4-0 zeta an sawp avangin 'pressure' pawh a san phah hle.

Chutihrualin derby-ah erawh point chauh inchuh loin hming ṭhat an inchuh tel a, ṭan phat aṭangin boruak a sang. Man City-in ball an chang tam a, chak an tum tih an lan rualin an thiamziak hmuh hmaih theih a ni lo. Bruno Fernandes-a telna United pawh an danglam a, awmze nei counter attack an neih theih avangin inkhel a nung hle.

Man City ball chan tam karah United-in Daniel James tlan chakna leh Anthony Martial ball thiamna hmangin Pep-a hote an rum ṭhaih a. Martial-a'n Bruno Fernandes pe loa goal khung tuma a pet avangin thutlukna a siam sual a, amaherawhchu French forward hian a tihsual thup nan goal a khung ta tho.

Minute 30-a goal luh dan hi a bu ang thlap a tih theih. Fred-a'n ball dahin freekick pet tum angin a hnung tawlh a, ball bula ding sa Bruno Fernandes-a'n 'chip pass' hmangin wall a pet khum a, City tlarhnung bumtu Martial-a'n goal-ah volley nghalin goal hmahruai a khung. Brazilian keeper Ederson-a'n a tih tur titawk lo nachungin United goal-in fak a hlawh hle.

Man City-in siphurh sut tumin an nawr na a, United chhanhimtu chu ṭum dang ang thoin David de Gea a ni a. Spanish keeper hian Gabriel Jesus khung tur a dang ṭha a, United defender Harry Maguire leh Aaron Wan-Bissaka te an khel ṭha a. VAR hmangin Sergio Aguero goal khung pawmsak a ni lo - United an vannei tel.

Injury time-ah United an hlauthawng a, amaherawhchu City keeper Ederson chesual nawnin Benjamin Mendy pass a tum chu Scotty McTominay-a'n nang fuh hmasa zawkin United midfielder hian goal ruakah mawi zetin a khung. City tan thochhuahna hun a awm tawh lo a, United 2-0 in an chak.

Tun hnai Old Trafford inkhelah hun tawp lama entu tlem deuh ṭum a tam hle. Derby-ah erawh United ṭantuten tun hma ang thoin hun tawp thlengin an team ṭan an ṭawiawm a, mual chhunga hmasawnnain entu lamah nghawng a nei lian hle.

Solskjaer hote hi match 10 chhung chak loh nei loin an kaltluang tawh a, Bruno Fernandes leh Odion Ighalo te hnathawh a ropui. Fernandes-a'n Martial leh James aṭangin ball ṭha a hmu lo chungin inkhel tawp lamah hlim hmel a pu a, bench-ah French forward nen lawm takin an inkuah.

Odion Ighalo pawh Old Trafford-a kal duh vangin hlawh tih tlem a huam a, United boruak ti ṭhatu zinga mi a ni. Nigerian striker hi City nen hun tawp lamah chauh lut mah se ball a chelh thei a, awmze neia ball a pekchhuah theih avangin United-in an neih loh player an nei tharah a ngaih theih.

Manager Solskjaer hnathawh hmuh hmaih a thiang lo a, goal hnihna luh theih nan bench aṭanga lut Ighalo leh McTominay te an ṭangkai a. Man City-in rawlthar duhawm Brandon Williams awmna lam aṭanga goal an nawr nat avangin Eric Bailly a luhtir a, mual vei lamah Shaw tawlh chhoin English defender hian City goal nawrna ber Riyad Mahrez a chelh.

Norwegian manager hnathawh a ropui a, a hmuna inkhel entu Premier League manager ropui ber Sir Alex Ferguson pawh United khelh danah a lawm tih hmuh hmaih rual a ni lo.