Gerrard-a Rangers an ropui zual zel

Scottish Premiership-ah Rangers champion chiang tawh mah se an tha an thlah phah lo a, Steven Gerrard-a enkawl team hian record an siam chhunzawm zel.

Nilaini zan khan Rangers hian khualmualah 3-0 in Livingston an hneh a, tun season league match 37 an khelh aṭangin match 25-ah goal an chhuah lo - Scottish league record an siam.

Rangers tan hian James Tavernier (penalty), Ryan Kent leh Ianis Hagi-ten goal khat ṭheuh an khung a, Livingston lamin a chhanletna tur an neih loh avangin 3-0 in Rangers an chak.

Record thar chu
Rangers-in match 25 ngawt goal an chhuah loh hi Scottish football-a match 38 khelh ngaihna league-a goal chhuah lohna match nei tam ber record a ni a, a chhuanawm tham hle.

Scottish Premiership-ah match khat chiah khelh tur a awm tawh a, Rangers hian May 15 zan dar 5:00-ah Aberdeen an mikhual dawn - goal hnih an chhuah lo a nih chuan record dang an siam leh ang.

Chelsea chuan 2004-05 season khan league-ah goal 15 chiah an chhuah a, British football-a season khata goal chhuah tlem ber record a ni. Rangers hian goal 13 chiah an la chhuah a, Chelsea record hi Aberdeen lakah an khum thei dawn.

Hmachhawp 100
Rangers hian league match 37 an khelh aṭangin tlawm an la nei lo a, vawi 31 chakin vawi ruk an khingpui an inhnehtawkpui a, tlawm nei loa season khar turin match khat chiah an hmabak ta.

Steven Gerrard-a team hma hian Celtic (1897-98), Rangers (1898-99) leh Celtic (2016-17) te chuan tlawm nei loin league nomawi an lo chawi tawh a, 2016-17 season-a Celtic tih loh hi chuan tun season angin league match 38 an khel tling lo thung.

Hei mai a ni lo - Rangers hian point 99 an nei mek a, an match tawp ber aṭanga point an hlawh chhuak a nih chuan an club chanchina a vawi khat nan point 100 nei chungin season an khar ang.

Goal khung thiam
Rangers-in goal an chhuah tlem miau avangin an tlarhnungin fak an hlawh lo thei lo a, hetiang boruak karah an tlarhma hi theihnghilh palh mai an hlauhawm - tun season league-ah goal 88 an khung tawh a, anmahni hnaih bertu Celtic-in goal 78 chiah an la khung.

Kum 2011 hnua a vawi khat nana league champion Rangers tan hian captain James Tavernier, striker Alfredo Morelos leh Kemar Roofe-ten goal 12 ṭheuh khungin league-a club tana goal khung hnem an ni mek.

Thil danglam ve tak pakhat chu Tavernier hi right back a ni - inelna hrang hrangah match 45 khelin goal 19-a khung a, assist vawi 15-a nei bawk.

"Rangers hian point 100 kan la hlawh chhuak ngai lo a, kan tan chuan hei hi min fuih phurtu a ni. Tunah chuan clean sheet record kan nei leh ta a, ka naute hian champion mai ni loin, sawi reng tawh tur thawnthu hnutchhiah turin hun ṭha an nei a nih hi". - Steven Gerrard, Rangers manager