Man United fans thinrimna belhchhahtu Reds United (ṭhat lai) 2 - 4 Liverpool (chhiat lai)
Sir Alex Ferguson chawlh hnua an season duhawm ber pawlah Manchester United-in Liverpool an mikhual a, Jurgen Klopp an neih hnua an season hman chhiat ber ṭumah Reds-in 4-2 in United an hneh.
United tan Bruno Fernandes chuan goal hmahruai khung mah se Liverpool-in Diogo Jota leh Roberto Firmino goal hnih hmangin an chhanglet a, Marcus Rashford hmangin Red Devils beiseina nung dawnin lang mah se Mohamed Salah chuan minute 90-naah a rawn hmet mit zui.
Ole Gunnar Solskjaer-a team ten season tharah Champions League an khelh chian dawn tawh avangin result-in nghawng thui a nei hran lo a, Liverpool erawh season thara Champions League khel turin an beiseina a nung thar leh ta sawt.
Liverpool hian match thum chiah khelh tur nei tawh chungin pangana dinhmun an luah a, palina Chelsea chu point li leka thlauin pathumna Leicester City chu point rukin an thlau bawk - an elpuite ai hian match khatin an khel tlem a, Blues leh Foxes hi an la inkhel leh dawn bawk.
United ṭha zawk
May 11 zan khan United-in 2-1 in Leicester City an ngam lo a, he inkhelah hian Ole-a'n 3-1 a Aston Villa an hnehna inkhel aṭangin player pakua ngawt a thlak a, Foxes hi Liverpool elpui an nih bawk si avangin Ole chu infiamna rilru pu loa che ang hiala puh a ni.
Mahse, Klopp-a'n Ole-a chhan a, Old Trafford an lenluh hma hian, "Pathianni, Thawhlehni leh Ningania inkhelh ngai hi a dik lo a, Solskjaer leh a player-te thiam loh a awm lo. Ole dinhmunah ding ta ila, a player siksawi ang khan ka siksawi ve tho ang em, tiin ka inzawt a, ka tih ve ngei ka ring a ni," tiin a sawi.
Old Trafford-ah erawh Ole-a'n Harry Maguire-a chhawr thei lo tih loh chu a neih ṭhat ber a thawhchhuahpui a, goal khung tur pawhin an nghah rei a ngai lo - minute 10-na lekah Bruno-a'n shot a nei a, hei hian Reds defender Nat Phillips perin goal-ah a lut.
Hetihlai hian khelmual pawn lamah United fan-ten club neitu Glazer chhungkua duh lohna an lantir a, boruak a rit a, United fan-ten an chuanna Bus thlenga an tihbuaisak Liverpool tan 'comeback' beisei a harsa.
Hriat hnu Liverpool
Tun season-a Liverpool kan hmuh ṭhin aṭanga teh chuan inkhel a harsa tawh dawn tih a chiang a, mahse, season hmasaa kan hmuh ṭhin, chak loh duh lo, goal khung châka tuihal Liverpool kha kan hmu.
Diogo Jota-a'n David de Gea aia thlan Dean Henderson-a enchhin hnuah a khung ta nge nge a, minute 34-naah Phillips-a shot chu mawi zetin a lo kheng zeuh a, Henderson-a'n a dang nawn tawh lo. United tlarhnung a pherh a, goal an chhuah chhanah puh tur dang an nei lo.
First half hun pek belhah Firmino hun a her chhuak a, Trent Alexander-Arnold-a freekick ṭha zet aṭanga ball kal chu a tauh lut - December-a Crystal Palace laka goal hnih a khung hnua goal-a khung leh hmasak ber a ni a, a nghak rei hle.
Brazilian forward a tui laklawh - second half ṭan aṭanga minute hnihna lekah Henderson-a'n Alexander-Arnold-a shot a dan per chu a khung leh a, March 2014-a Steven Gerrard hnua Liverpool player zinga Old Trafford-a goal hnih khung leh hmasa ber a ni.
A hming Salah
Liverpool-in 3-1 a hma an hruai hnuah Rashford-a hun a her chhuak a, minute 68-naah si phurh a sut ṭhen - United-in beiseina an nei thar a, chuhtihrual chuan Maguire tel lohna tlarhnung a pherh miau avangin an che zui hleithei lo.
Hun a tawp dawn tawh a, minute 90-na a ni - khel ṭha chunga goal la khung lo Salah a lo lang zawk a, Reds player thiam bik hian an goal lina a khung a, 4-2 in Liverpool an chak.
Salah-a'n tun season Premier League-ah goal 21-a khung tling ta chiah a, Tottenham Hotspur striker Harry Kane nen tun season-a goal khung hnem ber an ni mek.
Kum 28 mi Salah hian tun season inelna hrang hrangah match 48 khelin goal 30-a khung tling ta bawk a, assist vawi nga a nei tel. Reds fan-ten an hnena cham reng tura an duh chuan season tharah Champions League an khelh a ṭul ang.
United an vannei
Mahni mualah United-in goal li an chhuah a, heti chung hian an vanneih thu sawi tel a ngai - Eric Bailly-a'n Nat Phillips-a tih tluk avangin penalty a chawi a, referee Anthony Taylor-a'n VAR a rawn avangin sut leh a ni thung.
United player-ten set-piece a defending dan an thiam tawk lo ṭhin a, chumi pholangtu chu Liverpool goal hmasa pahnih kha a ni - an goal thumna an chhuah pawh tlarhnung pherh vang bawk a ni. Liverpool tan Jota-a'n khung ngeina tur nia langah post a pet per a, hei pawh hi United midfielder Fred-a ball pek sual aṭanga kal a ni - United-in zir tur an la ngah hle.
A tawi zawnga sawi chuan season thara Champions League khel tur United hian Premier League leh European football-a club inelna sang berah nomawi beisei an tum a nih chuan nipui transfer-ah player lei belh an mamawh ang.
Liverpool-in 'Jordan 7' an hre reng
Old Trafford-a an inkhelh hmain Liverpool player-ten 'Jordan 7' tih chuanna t-shirt hain warm-up an nei a, hei hi Thawhlehnia ṭek den vanga thi ta an fan ruhkawl hriatreng nana an tih a ni. Blackpool khaw naupang, kum kua mi leh Jordan Banks chu Thawhlehni khan Clifton Rangers Junior Football Club tana a khelh laiin ṭekin a deng a, damdawi inah hruai nghal ni mah se a hnu reilo teah a thi.
Liverpool ṭan rum ruttu, 'Mini-Milner' tia a coach-ten an koh naupang hian a thi hma lawk khan rilru lama harsatna tawkte ṭanpui nan £2,500 zet a lo khawn ngah tawh a, kum 2018-a ama nunna latu a putea hriatreng nen kilometer 48 chuang zet ni 10 chhunga tlanin sum hi a khawn ngah a ni. James Milner chuan Jordan hi a hnathawh avangin a lo fak tawh a, Ningani zana an inkhelh hma hian Liverpool leh United chuan Jordan an hriatreng thu social media lamah an tarlang bawk.
"Liverpool khan chak an phu zawk a ni. A pawimawh lai takin goal kan chhuah a, goal kan khung hmasa a, mahse, chu chu ṭha takin kan chhunzawm lo a, an rawn khel ṭha tur kha kan dang tawk lo bawk. Goal hnih tal kha chu kan 'khilai' a ni ber a, a pawimawh hunah kan che fuh lo. Team ṭha leh player ṭha kan tum a nih chuan awlsam taka an khungna tur kan siamsak tur a ni lo a, a bik takin hun ṭha kan siamsak hun angah khan kan chesual tur a ni lo". - Ole Gunnar Solksjaer, Manchester United manager
"Theihtawp kan chhuah a, game ṭha tak kan khel a, inkhel boruak sanga thleng tur ang tak a thleng a ni. Old Trafford-ah a vawi khat nan ka chak ve ta - kan mamawh lai takin kan chak a, kan phu em em bawk.
Champions League khelh kan la beisei reng a, zanin atan chuan hei hi kan tih theih chu a ni. A pawimawh ber chu kan hahdam a, kan insiamrem leh nghal vat hi a ni". - Jurgen Klopp, Liverpool manager
• Jurgen Klopp-a'n Old Trafford-ah a vawi khat nan hnehna a chang a, Liverpool-in khualmuala United an hneh hnuhnun ber chu March 2014 kha niin Brendan Rodgers enkawlna hnuaia an khelh lai a ni.
• April 1958 hnua a vawi khat nan ni thum chhung lekin mahni mualah a zawnin United an tlawm.
• United-in tun season-a league match an muala an khelhah goal 27 an chhuah tling ta a, 1969-70 (27 goals) hnua season khata league-a mahni muala goal an chhuah hnem ber ṭum a ni.
• Premier League-a an match hnuhnung pasarih aṭangin Liverpool-in vawi nga chak an nei a, vawi hnih an khingpui an inhnehtawkpui. Hemi hmaa an league match hnuhnung pasarihah Reds hi vawi ruk an tlawm thung.
• United-in tun season Premier League-a goal an chhuah 33% (14/42 - penalty tel loin) chu set piece aṭanga an chhuah a ni a, set piece aṭanga goal chhuah hnem ber a ni.
• Liverpool tana match 200-a khelh tlinnaah Salah-a'n a goal 124-na a khung a, assist 42-a nei tel. Reds tan match 200 khelha goal khung hnem lamah Roger Hunt (133) leh Gordon Hodgson (125) chiah a tluk lo.
• Firmino-a'n Liverpool tan Premier League-ah a lu hmangin vawi 17 zet a ti goal ta a, Premier League-a Reds tana ani aia goal tauh lut hnem chu Robbie Fowler (21 goals) chiah a ni.
• Rashford-a'n Liverpool-a hmachhawn hnuhnung pangaah goal nga a khung ta a, Reds laka a goal khung kha Old Trafford-a inelna hrang hranga goal 50-a khung tlinna chiah a ni bawk.
• Bruno-a'n United tana a Premier League match 50-na a khel a, hetih chhung hian goal 44-ah a inrawlh - vawi 26 goal khungin vawi 18 assist a nei a, United tana an match hmasa 50-a ani aia goal-a inrawlh hnem chu Eric Cantona (46) leh Robin van Persie (45) te chiah an ni.
• United tan chawlhlawk laia 2-1 a an hnufual kha Old Trafford-a tun season Premier League-a goal an khung hmasa chunga second half-a an hnufual vawi hnihna (vs Spurs) a ni a, Premier League-a season 28 an hman tawhah tun hmain hetiang hi vawi khat (vs Liverpool, 2008-09) chiah a thleng.
