Champions League khel tur a chiang thei lo!

Manchester City an champion chiang tawh a, Manchester United-in season tharah Champions League an khel dawn chiang tawh bawk.

Championship lama tla thla tur a chiang vek tawh a, Fulham, West Brom leh Sheffield United-ten season tharah Premier League an khel dawn lo.

Premier League season tawp lama 'hot' ber chu Champions League hmun ruak inchuh a ni ta a, Leicester City (66 points), Chelsea (64), Liverpool (60) leh West Ham (58)-ten season thara European club inelna sang ber khelh an la beisei vek.

West Ham-in zanin dar 12:30-ah Brighton & Hove Albion an lenchilh dawn a, Manchester United hneh hlim Liverpool hian Pathianni zan dar 9:00-ah West Brom an lenchilh dawn thung.

Hammers hian Brighton zawhah West Brom (May 19, away) leh Southampton (May 23, home) an la nei a, fixture aṭanga thlir chuan hmabak awlsam ber an ni.

Mahse, David Moyes-a team hi top four beisei zinga team 'pan' ber an ni a, hetihrual hian an hmabak match-a an chak vek bakah an chunga team-te chetsual an chan tel a ṭul dawn.

Liverpool-in Pathianni zanah Baggies an lenchilh ang a, Burnley (May 20, away) leh Crystal Palace (May 23, home) te an la hmabak bawk - Klopp-a team ten hnehna an chan vek chuan season thara Champions League khelhna chance a la sang hle.

Merseyside club elpui ber Chelsea leh Leicester City hi May 18 zanah an la inkhel dawn a, a khawi emaw zawk zawkin point an la hloh dawn tihna a ni.

Chelsea hian Leicester (home) zawhah Aston Villa (May 23, away) an la hmachhawn dawn a, Leicester City hian Chelsea zawhah Tottenham Hotspur (May 23) an mikhual dawn a, Brendan Rodgers-a naute hmabak hi a hautak bera ngaih a ni.

Hriat tel tur chu Chelsea leh Leicester hian zanin dar 9:45-ah FA Cup final an la khel dawn a, an fixture hi a awlsam lo hle - Liverpool tan erawh chanchin lawmawm a ni thung.

Liverpool boss Jurgen Klopp chuan, "Kan match hmabak zawng zawngah kan chak vek a ngai," a ti a, season thara Champions League khel tura tih tur an neih a hai lo.

German coach chuan sawi zawmin, "Tuna kan dinhmun en hian Newcastle United leh Leeds United laka draw result kha kan tan chuan tlawmna ang a ni," a ti a, an chakna tura an chak zo lo ṭhin chu pawi a tih thu a sawi.

Klopp chuan an kutah engkim a innghah thu sawi zuiin, "Champions League khelh leh khelh loh kan kuta a innghat hi thil ṭha a ni a, kum hnih thum liam taa kan awh ngawih ngawih ṭhin dinhmunah kan ding a ni," a ti a, hma an sawn nasat thu a sawi zui.