Chelsea-in Everton sawp

Frank Lampard-a kaihhruaina hnuaiah Pathianni zan khan Chelsea-in Everton 4-0 in an sawp. Blues tan Mason Mount (14'), Pedro (21'), Willian (51') leh Olivier Giroud (54') ten goal khat ṭheuh an khung a, Carlo Ancelotti hnuaiah Everton che ṭha mah se Stamford Bridge-ah erawh an zawr hle.

Blues manager Lampard-a'n player naupang zawk chungah rinna a nghat ngam a, inkhel bul ṭantu zingah kum 18 mi Billy Gilmour a tel. Gilmour hian kum 16 pianchamah Rangers aṭangin Chelsea a zawm a, Lampard hian nikum July thla khan Bohemians nen friendly match an neih ṭumin a chhawr tawh.

UEFA Super Cup-a Liverpool an hneh loh ṭumin Gilmour hi squad-ah a awm ṭan a, August 31- Sheffield nen nen an inkhelh ṭumin minute 84-naah Tammy Abraham a thlak. EFL Cup-a Grimbsy Town 7-0 a an hneh ṭumin a khel tluan a, FA Cup-a Liverpool an hneh ṭumin fak a hlawh bawk. Everton lakah hian Gilmour-a'n a vawi khat nan Premier League-ah bul a ṭan a, midfield-ah puitling taka khelin man of the match-ah thlan a ni hial.

Chutihrualin Everton nen hian Chelsea hi ṭan phat aṭangin an khel ṭha hrim hrim a, an goal bawh na tak chu Ancelotti hoten chelh ngaihna an hre lo. Inkhelh banah Italian manager Ancelotti chuan, "Engkim mai kha a kal fuh lo a, goal venhim kawngah kan hlawhchham a, tihsual kan nghah hle. Everton ka enkawl hnua ka team khelh danah ka lawm loh vawi khatna a ni a, kan tihsual lai uluk zawka zir ṭhat a ṭul dawn a ni," tiin an khel ṭha lo tih a pawm.

Chelsea manager Frank Lampard chuan, "Billy Gilmour-a'n a hun ṭha neih a theihna pholanna remchang atana a hman avangin inhliam vangin kan hnual phah lo. Gilmour kha Ross Barkley leh Mason Mount te nen an inkawp ṭha a, team pumpui thawhhona a ṭha bawk," tiin an khelh danah a lungawi hle.

Senior player fakin Lampard chuan, "Kan rawlthar player-te min faksak nasa a, chutihrualin tawnhriat nei ṭha an tel hi a paiwmawh a ni. Giroud-a'n goal min khung sak a, Pedro leh Willian te nen rawltharte tan teammate 

ṭha tak an ni a, kan team-ah kum upa leh naupang an inchawhpawlh ṭha hlein ka hria," tiin a sawi.