Quarterfinal-ah Barty a lut

Italian Open khelh laiah Ashleigh Barty chuan harsatna lian tham tawk loin quarterfinal a lut, nizan khan tleirawl beisei awm Coco Gauff nen semifinal lut tur an zawng chhunzawm a, result erawh kan hre hman lo.

Nilaini zan last 16 inkhelah Barty hian a khingpui Veronika Kudermetova chu 6-3, 6-3 in a hneh a, inkhel dangah Gauff pawhin kar hmasa lawkah Madrid Open champion Aryna Sabalenka chu 7-5, 6-3 in a lo hneh ve bawk.

Rome khawpuia inelna neih laiah player langsar ṭhenkhat an che fuh lo. Player ranking sang zual 10 zinga paruk chu an tla tawh, an zingah hian champion lai Simona Halep pawh a tel a, Naomi Osaka leh Serena Williams pawh a zinkawng a tawp tawh.

French Open champion Iga Swiatek erawh a la che fuh. Kum 19 mi Swiatek hian Barbora Krejcikova laka match point a inchhanhim hnuah 3-6, 7-6 (7-5), 7-5 in hnehna a chang.

Swiatek hian Elina Svitolina a hmachhawn leh dawn, ani hian Grand Slam vawi hnih champion tawh Garbine Muguruza chu 6-4, 6-2 in a lo hneh ve thung a ni. Inelna hi French Open inbuatsaihna a ni a, player ten an ngaipawimawh hle.