Zanin dar 9:45-ah FA Cup final Chelsea vs Leicester City
Chelsea leh Leicester City ten zanin dar 9:45 hian England rama khelmual hmingthang Wembley Stadium-ah FA Cup final an khel dawn a, team pahnihin nomawi chawi an duhzia tehna awmse a tawng sang dun khawp ang.
Thomas Tuchel-a'n Blues tana a nomawi hmasa ber lak theihna remchang a nei dawn tihna a ni. Foxes manager Brendan Rodgers pawhin 'manager ṭha teuh' ni ringawt lo a, manager ṭha tawk tak a nih chuan, a ṭha tawk tih fiahna remchang a ni bawk.
FA Cup final hi a hmunah entu 21,000 zet an awm thei dawn. Hripui leng vangin hun rei tak chhung chu a hmuna entu an awm mumal tawh lo, tun ṭum hi hri len hnua English football a entu an tam ber ṭum a ni dawn.
Dinhmun inang lo
Premier League table thlir chuan khelh zat inangah Leicester City hi Chelsea point hnihin an sang zawk a, season ṭha tak an hmang tih chu a chiang. FA Cup erawh a boruak a danglam dawn, league nena khaikhin chi a ni lo ang.
Leicester hian tun hmain FA Cup final hi vawi li an lut tawh a, a chak lo zawkah an ṭang vek - tunah hian 1968-69 season hnua a vawi khat nan final an lut leh chiah, final khel turin kum 52 an nghak tihna a ni; champion chakin an tuihal ang tih ring rawh.
Chelsea erawhin nomawi an chawi ngun. Knockout football inelna upa berah hian vawi riat ngawt an champion tawh. Season hmasa mai pawh khan final an lut a, mahse Arsenal an ngam lo. Antonio Conte hunlai (2017-18) kha an champion hnuhnung ber chu a ni.
Fiahna hmasa
Frank Lampard thlaktu Tuchel-a'n fak a hlawh a, danglamna a thlen dan chhutin fak pawh a phu. Chutih rualin German manager hi zuih ral thut thei a la ni ve tho, zanin hi a tan fiahna hmasa a ni dawn - champion ngei tumin a naute a rem ang.
Arsenal an hneh loh ṭumin Jorginho leh Kepa Arrizabalaga in man tawk loh vangin goal an chhuah, zaninah pawh first choice keeper Edouard Mendy aiah Kepa hi a lut dawn tih a sawi chiang. Tuchel chuan, "FA Cup final-ah bul a ṭan ang, ka ring tawkin a phu bawk," a ti.
Match hnuhnunga a dahṭhat N'Golo Kante hmel kan hmu tawh bawk ang. France international hi Tuchel-a player hman thiam ber ang hiala sawi ngam a ni rih a, ani hian league title a lakpui tawh Foxes goal nawr tur lo chhutchah chu a hna a ni dawn.
Timo Werner, Kai Havertz leh Mason Mount ten goal an nawr a nih chuan an khung ngei pawh a rinawm, a bik takin German player manto pahnih hi champion beisei vanga sum tak taka lakluh an nih avangin en bik an hlawh ang.
Rodgers a inringtawk
Leicester City manager Rodgers chuan, "Kum 50 chuang hnua final kan lut leh hi a ropui, ka tan pawh a hlu hle. Tuna kan inkhel tur hi mellung pawimawh tak phun theihna remchang a ni a, thawnthu ropui ziah kan tum ang," tiin champion a tum.
Khawvel barakhahin Foxes hian EPL nomawi an chawi tawh, tuna final an lut erawh thil mak a ni tawh lo - final kalkawngah hian champion tura rinkai Manchester United pawh an pet chhuak a, league-ah pawh Ole Gunnar Solskjaer-a hote hi an hneh. Blues hi an huphurh bik dawn lo.
Striker Jamie Vardy hi Chelsea tlarhnung su hawng turin a hriam tawk. English striker hi tun hnaiah khel ṭha tawk lo mah se Kelechi Iheanacho an la nei. Iheanacho hian kumin FA Cup-ah goal li khungin top scorer a ni mek, tlarhma lam chu an ṭha tawk.
Rodgers tana chanchin ṭha chu James Maddison rawn dam leh tawh hi a ni a, tlarhnunga an player pawimawh Jonny Evans chu a inlan theih a rinawm bawk. Foxes manager chuan, "Tlarhnunga kan thluak bur a ni a, pasalṭha a nih angin a khelh kan beisei," tiin a lo sawi tawh a ni.
