Juventus hmabak a hautak dawn
Inter Milan lakah Juventus-in Serie A nomawi an chan fel tawh, zaninah Italian club pahnih hi an intawng dawn. Old Lady tan season thara Champions League khel phak tur chuan chak loh a thiang tawh lo.
Italian football inelna sang ber hi match khelh hmabak pahnih chauh an nei tawh a, champion a chian tawh laiin UCL khel tur a la chuang lo. Atalanta, AC Milan, Napoli leh Juve ten an inchuh mek, team pali hi tling thei vek an la a ni - chet fuh loh erawh chuan tla vek thei an la ni.
Hmabak pathum
Andrea Pirlo-a'n a zawna season kua champion thei team chhawm mah se a hlawhtlin pui ve lo. Inter Milan nen an inkhelh hnuah Atalanta nen Coppa Italia final an khel ang a, season khar nan Bologna an tlawh leh bawk ang.
Old Lady hian season an hmang ṭha lo tih chu a chiang, amaherawhchu an khelh hmabak pathumah hian an chak vek a nih erawh chuan an mualphona tam tak chu an hliah khuh theiin a rinawm, chak loh erawh chuan player ṭha chelh thlengin a harsa dawn.
Boruak harsa leh khirhkhan an tawn lai hian Juve tan Gianluigi Buffon a la nei hi vanneihna a ni. Italian keeper hian Sassuolo lakah penalty dangin a team a chakpui a, point thum hlu tak an sual chhuak - khelmual chhung bakah a pawn lam thlengin Italian legend hi an mamawh.
A la zo lo
Kum 11 hnua a vawi khat nan Inter Milan an champion a, league nomawi an chawi hnuah pawh manager Antonio Conte chuan, "Season a la tawp lo, a tawp thlengin theihtawp kan chhuah ang," tiin a sawi, an elpui Juve tana thu hriat nuam a ni lo ang.
Inter hian tun hnaiah Sampdoria leh AS Roma te an sawp a, match hnihah hian goal riat khungin anmahni lamah goal hnih chiah a lut. Conte-a'n tlarhnung a rem phui ṭha viau - Turin club tana goal 100 khung thei Cristiano Ronaldo tan pawh paltlang a awlsam lo mai thei.
Conte hian player a nih laiin Juve captain armband a hreng phak, coach a nih hnuah Old Lady hi vawi thum a champion pui. Mahse, tunah erawh hmelma an ni rih. February-a Italian Cup an khelh ṭumin Conte hian Juve president Andrea Agnelli chu a kut zunglai a lo phawrh khum tawh, hei hian an boruak chu a sawifiah.
Thil awmzia
• Atalanta leh Milan ten point 75 ve ve an hmu a, an hnungah hian Napoli (73 points) leh (72) te an awm.
• Atalanta leh Milan hian tur kar tawpa an khingpui - Genoa leh Cagliari te an hneh chuan, an pahnih hian UCL khel turin an
tling dawn.
• uve-in an khelh hmabak pahnihah hnehna chang se, Atalanta leh Milan hian point an hloh a nih chuan an la umphak thei. Mahse, head-to-head an nei chhe zawk.
• Old Lady hi Inter lakah an chak lo a nih a, an elpui Napoli-in hnehna an chang a nih si chuan Pirlo naute tan UCL beiseina a bo dawn.
