Sancho leh Haaland-ten German Cup-ah Dortmund an champion pui

Borussia Dortmund-in Ningani zan DFB Pokal final khelhah RB Leipzig 4-1 a hnehin an champion. Olympiastadion Berlin-a inkhelah hian Dortmund tan Jadon Sancho leh Erling Haaland ten goal hnih ve ve an khung.

Dortmund-in a vawi ngana atan German Cup-ah an champion a, Schalke record an nihrualin an chungah Bayern Munich (20) leh Werder Bremen (6) te chauh an awm. Season tawp ruala chhuak tur manager lailawk Edin Terzic-a'n Dortmund a champion pui a, season thara Champions League khel thei dinhmuna a dintir bawk chuan a awl rei lo ang.

Kum 33 mi Julian Nagelsmann erawhin fak hlawh ṭhin viau mah se inelna lian thamah nomawi a la chawi lo a, amaherawhchu season thar aṭanga Bayern Munich a enkawl dawn avangin nomawi erawh a chawi thuai ang.

Goal nga a lut
Minute ngana lekah Erling Haaland-a'n Mahmoud Dahoud a pe a, Germany international midfielder hian Sancho a pe leh. Goal hlauhawm niin la lang lo mah se Sancho hian box chhung chiah aṭangin a pet goal a, English winger hmaa ding Leipzig player pali an hawi hai hle.

Striker ṭha bik Erling Braut Haaland-a'n minute 28-naah mi bik a nihzia a pholang a, Marco Reus hnen aṭanga a ball hmuh chu box chhungah a la lut. Norwegian striker Haaland-a'n tharum a ngahzia a pholang a, season thara Bayern Munich zawm tur Dayot Upamecano chu tharum nen bum thluin goal ṭha zet a khung.

First half hun pek belhah Leipzig an chesual a, Reus-a'n offside trap bumin a khalh lut a, Jadon Sancho pe lehin English winger hian goal ruakah a khung. Dortmund hian first half-ah goal thum khung mah se Leipzig lamin an nawr nat ve tho avangin nuamsain an awm thei lo.

Second half-ah Julian Nagelsmann-a'n chak duhin Christopher Nkunku leh Yussuf Poulsen te a luhtir a, an goal nawr pawh a na hle. Leipzig substitute Nkunku hian hnai tak aṭangin crossbar a pet per nghal. First half-a chance ṭha hlahtu Marcel Sabitzer leh Dani Olmo ten goal-ah ṭha takin an pet ve ve a, keeper Roman Burki-a'n a dansak ve ve.

Minute 71-naah Olmo-a'n box pawn aṭangin kawh zetin Leipzig tan a pet goal a, Poulsen-a'n ball la nghalin lehthal theih an la inbeisei. Amaherawhchu Leipzig-in an nawr luat an tuar a, minute 87-naah Dortmund-in counter attack aṭangin an khung. Sancho ball pass chu Haaland-a'n tlu pahin a pet a, keeper Peter Gulacsi bumin chak nemnghehna goal a khung.

Eng nge an sawi?
Borussia Dortmund head coach Edin Terzic chuan, "Kan khelh ṭhat ber ṭum a ni lo a, mahse final-ah chuan chak a pawimawh a, khelh ṭhat ringawt a tawk lo. Chuvangin kan hlawhtlinna avanga hlim hi kan phu a ni," tiin a sawi.

RB Leipzig head coach Nagelsmann chuan, "Dortmund ka lawmpui. Kan chak loh avangin kan hnual a, chutihrualin inchhuanna tur a awmin ka hria. Kan khel ṭha a, goal luh dan erawhin a sawifiah lo. 3-0 a kan hnufual chunga khati taka ka naute an khel ṭha kha, ka lawm hle a ni," tiin an phu tawk result hmu loa a inngaih thu a sawi.

DFB Pokal-ah hian Dortmund winger Sancho-a'n goal ruk a khung a, top scorer a ni. Nikum nipui transfer-a Manchester United nena sawi zawm Sancho-a hlutna a sang leh sawt ang.