Harsa takin Nadal a chak hram

Rafael Nadal-a'n Italian Open quarterfinal lut turin vanneihna a mamawh tel. Spanish tlangval hian match point vawi hnih a inchhanhim hnuah Denis Shapovalov a hneh hram a, season danga clay court chunga a chet ropui angin a la khel chhuak rih lo.

Ningani zan inkhelah Nadal hian darkar thum leh a chanve vel an inkhelh hnuah Canadian player hi 3-6, 6-4, 7-6 (7-3) in a hneh a, set thumna an khelh lai hian Shapovalov-a'n chak theihna remchang vawi hnih nei mah se a chhawr ṭangkai thei lo a ni.

Grand Slam vawi 20 champion tawh Nadal hian a ṭum 10 nan Italian Open title lak a beisei mek, nizan khan German player Alexander Zverev nen an inhmachhawn leh a, result kan hre hman lo - kar hmasa khan player pahnih hi intawng tawhin Zverev zawk a chungnung.

Rome khawpuia inkhel dangah Novak Djokovic pawhin hnehna a chang a, world number 1 hian Alejandro Davidovich Fokina chu 6-2, 6-1 a sawpin harsatna a tawk lo, champion nawn a tum ruh hle.

Italian Open khelh tir lamah khan a hmuna entu awm phal a ni lo, last 16 aṭang erawhin entu an awm leh tawh; stadium len zawng aṭanga chhutin 25% zelin vawi khatah inkhel an en thei leh tawh a ni.

Djokovic chuan, "Thil ṭha a ni satliah lo, a hmuna entu an awm hi a ropui takzet a ni. Kan inkhel entu an awm vang chauha inkhel ve zel theih chauh hi kan ni a, anni tel lo chuan nawmna a awm meuh lo, tunah chuan inelna hmachhawn pawh a phurawm zual," a ti.

Kum 33 mi Djokovic hian a match lehpekah chuan Stefanos Tsitsipas a hmachhawn ang. Greek tlangval hian inkhel dangah tualchhung player Matteo Berrettini chu 7-6 (7-3), 6-2 in a lo hneh ve bawk.