Champion tum Real-in Atletico an thlah fal duh lo

La Liga-ah match hnih chiah khelh tur a awm tawh a, champion tur a la chiang thei lo - Real Madrid chuan Ningani zan khan 4-1 in Granada an hneh ve leh ta.

Real tan Luka Modric, Rodrygo, Alvaro Odriozola leh Karim Benzema-ten goal khat ṭheuh an khung a, Granada tana Jorge Molina goal khungin awmzia a nei phak lo. Zinedine Zidane-a nauten hnehna an chan avangin hmahruaitu Atletico Madrid an thlauhna chu point hnih chiah a ni a, Diego Simeone enkawl team tan champion turin point hloh a thiang lo tihna a ni.

Barcelona chu pathumnaah an la awm ve mek a, mahse, Catalan club hian point li ngawta Atletico an thlauh avangin an tan champion tur chuan thilmak a thlen tel a ngai tawh ang.

A goal hma
Minute 17-na lekah Real-in goal hmahruai an khung a, kum 19 mi Miguel Gutiérrez-a ball pass ṭha tak chu Modric hian Real goal hmasa ber ni turin a khung.

Kum 35 mi Modric-a'n La Liga match 33 aṭanga goal li a khungna a ni a, assist vawi thum a nei tawh bawk - Granada lakah pawh Modric a khel ṭha a, Zinedine Zidane tan rinrawl a la ni zel.

First half hun pek belhah Real bawkin goal an khung leh a, Rodrygo hun a inher chhuak ve thung. Kum 20 mi rawlthar duhawm hian hmabak nei êng tak a ni tih pholangin an goal hnihna a khung a, kum 20 mi Marvin Park-a siamsak a ni.

Rodrygo hian tun season La Liga-ah match 20 khel tawhin goal khat a khungna a ni a, assist vawi nga a nei bawk - khelmuala minute a hman zat hi 869 a ni a, a statistic hi a khelh zat aṭanga teh a rem lo.

A tawpah Benzema
Granada-in second half-ah hma an sawn a, minute 71-naah si phurh an rawn sut ṭhen. Luis Suarez-a'n uiawm taka a hun ṭha a hman loh hnuah shot ṭha tak a nei zui a, Thibaut Courtois chuan a dang per.

Belgian keeper dan per hi kum 39 mi Jorge Molina chuan goal-ah a lo chantir a, tun season inelna hrang hranga a goal 14-na hmangin a team tan beiseina a siamsak.

Mahse, Granada hlim chhung a rei lo. Minute li hnu lawkah Odriozola chuan Eden Hazard siamsak chu Real goal thumna ni turin a khung a, minute khat hnu lawkah Benzema chuan Granada keeper Rui Silva tihsual nangchingin goal ruakah a khung ve leh bawk.

Kum 33 mi Benzema hian tun season inelna hrang hrangah match 44 khelin goal 29-a khung tling ta a, assist vawi riat a nei bawk - La Liga bikah goal 22-a khung tawh.

Real & rawlthar
Madrid khaw club-in first half-ah goal hnih an khung a, he goal-ah hian kum 20 tling lo player pathumte an inrawlh vek - Real-in rawlthar an nei ṭha tih a lang.

Modric-a goal khung tur siam-saktu Gutierrez kha kum 19 mi lek niin left back a ni a, Real tan La Liga match li a khelh vena chiah a ni. Hmabak a nei êng hle. Real goal hnihna khungtu Rodrygo erawh a ṭhiante angin top flight football-ah a mikhual lo a, Brazilian rawlthar hi lo chhinchhiah rawh - a chanchin kan la hre dawn chauh.

Rodrygo goal khung tur siamsaktu Park kha a pa Nigerian niin, a nu erawh Korean a ni a, Spain khua leh tui nihna neiin kum 20 mi a ni a, La Liga-a match li a khelh vena chauh a ni - right back leh wing-ah a chhawr kawp theih.

Hmabak
Pathianni zan dar 10:00-ah Real Madrid-in Athletic Bilbao an lenchilh dawn a, Pathianni zan dar 10:00-ah vek Atletico Madrid chuan Osasuna an mikhual dawn thung.

Real an chak zawh loh a, Atletico an chak chuan Diego Simeone-a naute hi La Liga-ah an champion fel der dawn a, Pathianni zanah Spanish champion hriatna 'chance' a awm tihna a ni. Pathianni zan dar 10:00-ah Barcelona chuan Celta Vigo an mikhual dawn bawk a, Ronald Koeman-a naute tan champion beisei chu thilmak beiseina ang chauh a ni tawh.

Tun kartawpah champion a la chiang lo a nih pawhin May 23-ah La Liga match tawp ber khelh a ni tawh dawn a, Real hian Villarreal (home), Atletico-in Real Valladolid (away) leh Barcelona-in Eibar (away)-te match tawp berah an hmachhawn ang.