Ngai ka la awh rih lo - Marquez

MotoGP vawi ruk champion tawh Marc Marquez chuan a hliam a dam tawh thu a sawi a, mahse tun hma anga a theihna sang tak pho chhuak leh tur erawh chuan ngai a la awh leh rih loh thu a sawi.

Season hmasa khan intlansiak hmasa berah Marquez a chesual a, atan season a tawp zui nghal. Kuminah pawh inelna hmasa pahnihah a inlan thei lo, a lo kir hnuah intlansiak ṭum hnih hmachhawn leh tawh mah se dawhsan (podium) a la lawm phak rih lo.

Repsol Honda rider Marquez chuan, "Tun hnaiah doctor nen kan inhmu a, ka ban dinglam ruh pawh a ṭha zel. Ruh na zai hawn a nih avangin ngaiawh leh mai chu a harsa, tihrawl ka ngah tawh lo a, ban tha chak ṭha tak nei leh tur chuan tihrawl siam tam a ngai dawn.

"Jerez-a inelna kan neih hnuah khan ka ban ka hmang nasa zual a, harsatna ka tawk hran lo. Nitina bike khalh tur chuan ka taksain a la tlin chiah lo deuh, mahse ka dinhmun hi a ṭhat zel avangin hun rei vak lo hnuah chuan ngai ka awh theih a beisei awm," a ti.

Marquez awm loh karah khan Honda hian chak ni hmel an hmu thei lo. Intlansiak vawi 18 zet chu a hmasa berah an thleng ta lo a, 2008 British GP aṭang 2009 Dutch GP chhunga an chak loh hnuah, tunah hian chak nei loa an kal rei ber ṭum an tawng.

Spanish rider Marquez chuan, "Honda team kan che ṭha tawk lo tih hriat hi thil hrehawm tak a ni. Tunah chuan zawi muangin hma kan sawn leh tawh, inelna kan neih hnuhnung ho kan thlirlet a nih chuan a bul ṭan ṭhat a pawimawh tih chiang takin a lang," a ti.

May 16, Pathianni tlai dar 5:30 hian Bugatti Circuit-ah French Grand Prix an tlan dawn a, tun hma angin Marquez hi la ṭha tawk lo mah se rider dangte tana elpui hautak chu a ni chho leh tawh tura beisei a ni.

Bike intlansiakna snag ber hi kuminah vawi 23 neih tura ruahman a ni a, vawi li an tlan tawh. Hrileng vangin ruahman lawk ang vek chuan an kal thei dawn lo. Argentina GP leh Grand Prix of The Americas te chu a hun sawn a ni tawh.

Tun hnai khan coronavirus vangin Finnish Grand Prix chu neih theih a ni dawn lo tih an sawi chiang. Inelna tam tak an hmachhawn thei lo a nih chuan Indonesian Grand Prix chu a kar laka neih tura duan lailawk a ni thung.